തളിപ്പറമ്പ്: പരിയാരം മെഡിക്കല്‍ കോളജ് ഒന്നാംവര്‍ഷ എം.ബി.ബി.എസ് വിദ്യാര്‍ഥിയെ റാഗ് ചെയ്‌തെന്ന പരാതിയില്‍ ബി.ഡി.എസ് വിദ്യാര്‍ഥിക്കെതിരെ പരിയാരം പൊലിസ് കേസെടുത്തു. മെഡിക്കല്‍ കോളജ് പ്രിന്‍സിപ്പല്‍ നല്‍കിയപരാതിയിലാണ് സീനിയര്‍ ബി.ഡി.എസ് വിദ്യാര്‍ഥി അര്‍ജുനെതിരെ കേസെടുത്തത്. ഇതുസംബന്ധിച്ച് ഒന്നാം വര്‍ഷ എം.ബി.ബി.എസ് വിദ്യാര്‍ഥി അബ്ദുല്‍ സമദ് പ്രിന്‍സിപ്പലിന് പരാതി നല്‍കിയിരുന്നു. കഴിഞ്ഞ ആറിന് രാത്രി പതിനൊന്നിന് ഹോസ്റ്റലില്‍ അര്‍ജുന്‍ മര്‍ദിച്ചതായാണ് പരാതി. റാഗിങിനെ ചെറുത്തതാണ് അര്‍ജുന്‍ മര്‍ദിക്കാന്‍ കാരണമെന്നും പറയുന്നു. പരാതി പരിശോധിച്ച അച്ചടക്ക സമിതിയുടെ തീരുമാനത്തെ തുടര്‍ന്നാണ് പ്രിന്‍സിപ്പല്‍ കെ സുധാകരന്‍ പൊലിസില്‍ പരാതി നല്‍കിയത്.