കണ്ണൂര്‍: കുളങ്ങളും പൂക്കളും കൊയ്ത്തുത്സവങ്ങളും വരകളില്‍ നിറച്ച് കുരുന്നുകളുടെ രചനാമത്സരം. വറ്റുന്ന നീരുറവകളും വറ്റാത്ത പ്രകൃതി ഭംഗിയും മുതല്‍ പുഷ്‌പോത്സവവും കൊയ്ത്ത്കാഴ്ചകളുമെല്ലാം കാന്‍വാസില്‍ നിറഞ്ഞുതുളുമ്പി. സംസ്ഥാനതല പഞ്ചായത്ത് ദിനാഘോഷത്തിന്റെ ഭാഗമായിട്ടായിരുന്നു വിദ്യാര്‍ഥികള്‍ക്കായി ചിത്രരചനാ മത്സരം നടത്തിയത്. എല്‍.പി മുതല്‍ ഹയര്‍ സെക്കന്‍ഡറി വരെയുള്ള ക്ലാസുകളിലെ നൂറോളം കുട്ടികളാണ് പങ്കെടുത്തത്.
മുനിസിപ്പല്‍ ഹൈസ്‌ക്കൂള്‍ ജൂബിലിഹാളില്‍ നടന്ന പരിപാടി കേരള ചിത്രകലാ പരിഷത് രക്ഷാധികാരി ആര്‍ട്ടിസ്റ്റ് ഗോവിന്ദന്‍ കണ്ണപുരം ഉദ്ഘാടനം ചെയ്തു. പബ്ലിസിറ്റി കമ്മിറ്റി ചെയര്‍മാന്‍ കെ.ഇ കുഞ്ഞബ്ദുള്ള അധ്യക്ഷനായി. കേരള ഗ്രാമപഞ്ചായത്ത് അസോസിയേഷന്‍ സംസ്ഥാന സെക്രട്ടറി കെ നാരായണന്‍, പഞ്ചായത്ത് ഡെപ്യൂട്ടി ഡയറക്ടര്‍ എം.എസ് നാരായണന്‍ നമ്പൂതിരി എന്നിവര്‍ ജില്ലാ ഇന്‍ഫര്‍മേഷന്‍ ഓഫിസര്‍ ഇ.കെ പത്മനാഭന്‍, ജില്ലാ ബ്രൈറി കൗണ്‍സില്‍ സെക്രട്ടറി പി.കെ ബൈജു സംസാരിച്ചു.