വിജിന്‍ വിജയപ്പന്‍

കോട്ടയം: മുഖ്യമന്ത്രിയുടെ സുതാര്യ കേരളം പദ്ധതി അവതാളത്തില്‍. പരാതി പരിഹാരസെല്ലിലെ കരാര്‍ ജീവനക്കാരുടെ പരാതി ആരു പരിഹരിക്കുമെന്ന ചോദ്യമാണ് ഇപ്പോള്‍ ഉയരുന്നത്. ഇവര്‍ക്ക് ശമ്പളം ലഭിച്ചിട്ട് മാസങ്ങള്‍ ആയി. മുട്ടാപ്പോക്ക് ന്യായങ്ങള്‍ നിരത്തി പലപ്പോഴും ശമ്പളം തടയുന്ന സ്ഥിതിയാണ് ഇവിടെ. പദ്ധതിയുടെ ആരംഭത്തില്‍ തന്നെ ശമ്പളപ്രശ്‌നം പ്രതിസന്ധി സൃഷ്ടിച്ചിരുന്നു.
 നാലുമാസമായി സുതാര്യകേരളം സെല്ലിലെ ജീവനക്കാര്‍ക്ക് ശമ്പളം ലഭിച്ചിട്ടെന്ന്  ഇവര്‍ തന്നെ വ്യക്തമാക്കുന്നു. മൂന്നു പേര്‍ അടങ്ങുന്ന ജില്ലാ സെല്ലില്‍ ഒരു മാസം ശമ്പളത്തിനായി  24,500 രൂപവേണം. ജില്ലാ കോ-ഓര്‍ഡിനേറ്റര്‍- 9,500, ടൈപ്പിസ്റ്റ്-8000, മെസഞ്ചെര്‍-7000 ഈ നിരക്കിലാണ് ശമ്പളം നല്‍കുന്നത്. കണക്കുകള്‍ പ്രകാരം കോ-ഓര്‍ഡിനേറ്റര്‍ക്ക് 38000 രൂപയും ടൈപ്പിസ്റ്റിന് 32000രൂപയും  മെസെഞ്ചറിന് 28000 രൂപയുമാണ് കുടിശികയായി ലഭിക്കാനുള്ളത്.  
 ഇത്തരത്തില്‍ ശമ്പളമില്ലാതെ 42 ജീവനക്കാര്‍ ആണ്  ജില്ലാ സെല്ലുകളില്‍ ജോലിയെടുക്കുന്നത് . നാല്‍പ്പതില്‍പ്പരം ജീവനക്കാരുടെ ശമ്പളം മുടങ്ങിയിട്ടും  കൈമലര്‍ത്തുകയാണ് അധികൃതര്‍.  ഒരു വര്‍ഷത്തെ കരാര്‍ വ്യവസ്ഥയിലാണ് ഇവിടെ ജീവനക്കാര്‍ തൊഴില്‍ ചെയ്യുന്നത്.

 സ്ഥിരം ജീവനക്കാര്‍ക്ക് കൃത്യമായി ശമ്പളം നല്‍കുമ്പോഴാണ് കരാര്‍ ജീവനക്കാര്‍ ഇത്തരത്തില്‍ ദുരിതം നേരിടേണ്ടി വരുന്നത്. ലക്ഷങ്ങള്‍ മുടക്കി പത്രപരസ്യം നല്‍കിയും പുതിയ ഓഫിസുകള്‍ നിര്‍മിച്ചും എല്ലാ ജില്ലകളിലും ആരംഭിച്ച പദ്ധതിയ്ക്ക് വന്‍ പ്രതികരണം ലഭിച്ചിരുന്നെങ്കിലും ഇപ്പോള്‍ ജീവനക്കാര്‍ നിരാശയിലാണ്. വിവിധ ജില്ലാസെല്ലുകളുടെ പ്രവര്‍ത്തനവും പലപ്പോഴും അവതാളത്തിലാകുന്നുണ്ട്.  ജേര്‍ണലിസത്തില്‍ ഡിപ്ലോമയുള്ളവരെയായിരുന്നു  കോ- ഓര്‍ഡിനേറ്ററായി നിയമിച്ചിരുന്നത്.  സെല്ലിലൂടെ പരിഹരിക്കുന്ന പ്രശ്‌നങ്ങളെക്കുറിച്ചുള്ള വാര്‍ത്തകള്‍ പി.ആര്‍.ഡിയിലൂടെ മറ്റു മാധ്യമങ്ങള്‍ക്ക് നല്‍കണമെന്നും തുടക്കത്തില്‍ അറിയിപ്പുണ്ടായിരുന്നു. ഇത്തരത്തില്‍ വാര്‍ത്തകള്‍ തയാറാക്കി  നേട്ടങ്ങള്‍ പൊതുജനമധ്യേ എത്തിക്കുവാനായിരുന്നു സര്‍ക്കാര്‍ ശ്രമം.
ഇതിന് വാര്‍ത്തകള്‍ തയാറാക്കി നല്‍കുകയെന്നതായിരുന്നു കോ ഓര്‍ഡിനേറ്റര്‍മാരുടെ ചുമതല. എന്നാല്‍ ഇക്കാര്യത്തില്‍ പല ജില്ലാസെല്ലുകളിലും  തുടക്കം മുതലേ വീഴ്ച സംഭവിച്ചിരുന്നു. പക്ഷേ, ഇക്കാര്യത്തില്‍ ശ്രദ്ധ പുലര്‍ത്തുവാന്‍ അധികൃതരും തയാറായിരുന്നില്ല. സര്‍ക്കാര്‍ നേട്ടങ്ങളില്‍ ഒന്നായി സുതാര്യ കേരളം പദ്ധതിയെ ഉയര്‍ത്തിക്കാണിക്കുവാന്‍ മാത്രമായിരുന്നു ശ്രമം.
പരാതി നല്‍കിയാല്‍ രണ്ട്  ആഴ്ചയ്ക്കകം  പരാതിക്കാരന് മറുപടി നല്‍കണമെന്നായിരുന്നു വ്യവസ്ഥ. പക്ഷേ, സര്‍ക്കാര്‍ സംവിധാനങ്ങളുടെ സഹകരണമില്ലായ്മ മൂലം പലപ്പോഴും മറുപടി കൃത്യമായി നല്‍കാന്‍ കഴിയാത്ത സ്ഥിതിയും നിലനില്‍ക്കുന്നുണ്ടെന്ന്  ജീവനക്കാര്‍ പറയുന്നു. പുതിയ  സര്‍ക്കാര്‍  പ്രതിസന്ധിക്ക് പരിഹാരം കണ്ടെത്തുമെന്ന വിശ്വാസത്തിലാണ്  ഇപ്പോള്‍ ജീവനക്കാര്‍.