കോഡൂര്‍: ആല്‍പ്പറ്റക്കുളമ്പ പി.കെ.എം.യു.പി.സ്‌കൂളില്‍ വിദ്യാര്‍ഥികള്‍ക്കായി സിവില്‍ സര്‍വിസ് പരിശീലനം തുടങ്ങി. ആല്‍പ്പറ്റക്കുളമ്പ യു.പി സ്‌കൂളിലെയും വലിയാട് യു.എ.എച്ച്.എം.എല്‍.പി സ്‌കൂളിലെയും വിദ്യാര്‍ഥികള്‍ക്കാണ് പരിശീലനം നല്‍കുന്നത്. പരിശീലനത്തിന്റെ ഭാഗമായി വിദ്യാര്‍ഥികള്‍ക്കായി നടത്തിയ പ്രത്യേക അഭിരുചി പരീക്ഷയില്‍ നിന്നും തെരഞ്ഞെടുക്കപ്പെട്ടവരാണ് ക്ലാസ്സുകളില്‍ പങ്കെടുക്കുന്നത്. പരിശീലനം സൗജന്യമായിട്ടാണ് നല്‍കുന്നത്.
നിലവില്‍ സിവില്‍സര്‍വിസ് പരിശീലനം നല്‍കിക്കൊണ്ടിരിക്കുന്ന മലപ്പുറത്തെ സ്വകാര്യ സ്ഥാപനവുമായി സഹകരിച്ചാണ് പദ്ധതി നടപ്പാക്കുന്നത്.
പരിശീലന പരിപാടിയുടെ ഉദ്ഘാടനവും രക്ഷിതാക്കള്‍ക്കുള്ള അവബോധ ക്ലാസും ആല്‍പ്പറ്റക്കുളമ്പ പി.കെ.എം.യു.പി.സ്‌കൂളില്‍ മലപ്പുറം പൊലിസ് സ്റ്റേഷനിലെ സബ് ഇന്‍സ്‌പെക്ടര്‍ ബി.എസ് ബിനു ഉദ്ഘാടനം നിര്‍വ്വഹിച്ചു. ഗ്രാമപ്പഞ്ചായത്ത് പ്രസിഡന്റ് സി.പി ഷാജി അധ്യക്ഷനായി. എന്‍ഷൈന്‍ അക്കാദമി ട്രെയ്‌നിങ് കോഡിനേറ്റര്‍ ജവഹര്‍ ക്ലാസ്സെടുത്തു.