ചെങ്ങന്നൂര്‍: കഴിഞ്ഞ വ്യാഴാഴ്ച വരെ ആരും ഏറെ ശ്രദ്ധിക്കപ്പെടാതിരുന്ന കെട്ടിടമാണ് കോടതിറോഡിനു സമീപമുള്ള ഉഴത്തില്‍ ബില്‍ഡിങ്.  പ്രവാസിയായ ഉഴത്തില്‍ ജോയ് ജോണിന്റെ കൊലപാതകത്തോടെയാണ് നഗരത്തിലെ ശ്രദ്ധാകേന്ദ്രമായി ഈ മൂന്നു നിലകെട്ടിടം മാറിയത്.
 27ന് രാത്രി പൊലീസ് ഈ കെട്ടിടത്തിന്റെ താഴത്തെ നിലയിലേക്കുള്ള പ്രവേശനം അടച്ച് കാവല്‍ ഏര്‍പ്പെടുത്തിയതോടെയാണ് നാട്ടുകാരുടെയും വ്യാപാരികളുടെയും ശ്രദ്ധ ഇവിടേക്ക് തിരിഞ്ഞത്.  28ന് രാവിലെതന്നെ വന്‍ പൊലിസ് സന്നാഹം കെട്ടിടത്തിലെത്തിയതോടെ നൂറുകണക്കിന് ആളുകള്‍ ഇവിടെ തടിച്ചുകൂടി.
കെട്ടിടത്തില്‍ നിന്ന് കരിഞ്ഞ മാംസകഷണങ്ങളും ജോയ് ജോണിന്റെ ചെരുപ്പും ഉടുപ്പിന്റെ ബട്ടന്‍സും ലഭിച്ചതോടെയാണ് കൊലയുടെ ചുരുളഴിയുന്നത്.
 വായു സഞ്ചാരവും വെളിച്ചവും കുറഞ്ഞ ഇവിടുത്തെ തെളിവെടുപ്പ് പൊലീസിന് ഏറെ ദുഷ്‌ക്കരമായിരുന്നു. അന്വേഷണ സംഘത്തില്‍ തഹസീല്‍ദാര്‍, വിരലടയാള വിദഗ്ധരും സയന്റിഫിക് വിദഗ്ധരും ഡോഗ് സ്‌ക്വാഡും സ്ഥലത്തെത്തിയിരുന്നു.