എടച്ചേരി: നാട്ടിന്‍പുറങ്ങളിലെ റോഡരികുകള്‍ മാലിന്യങ്ങള്‍ നിറച്ച ചാക്കുകള്‍ ദിവസങ്ങളായി കെട്ടിക്കിടക്കുന്നു. ഹരിത കേരളത്തിന്റെ ഭാഗമായി പഞ്ചായത്തു ഭരണസമിതികളുടെ നേതൃത്വത്തില്‍ നടത്തുന്ന മാലിന്യ നിര്‍മാര്‍ജ്ജന പദ്ധതിയുടെ ഭാഗമായി ശേഖരിച്ച മാലിന്യങ്ങളാണ് പഞ്ചായത്തു റോഡുകളുടെ അരികില്‍ കൂമ്പാരമായി കിടക്കുന്നത്. ഒരു വാര്‍ഡില്‍ നിശ്ചയിക്കപ്പെട്ട വിവിധ കേന്ദ്രങ്ങളിലാണ് മാലിന്യ സഞ്ചികള്‍ കൂട്ടിയിട്ടിരിക്കുന്നത്.
വീടുകളിലെ മാലിന്യങ്ങള്‍, ജൈവം, അജൈവം, പ്ലാസ്റ്റിക് എന്നിങ്ങനെ തരം തിരിച്ച് ചാക്കുകളിലാക്കി നിശ്ചയിക്കപ്പെട്ട സ്ഥലങ്ങളില്‍ വീട്ടുകാര്‍ എത്തിക്കുകയാണ് ചെയ്യുന്നത്. ഇതിന് ഒരു വീട്ടില്‍ നിന്നും 150 രൂപയാണ് വീട്ടുടമകളോട് വാങ്ങിക്കുന്നത്. ഒരു പഞ്ചായത്തിന്റെ വിവിധ കേന്ദ്രങ്ങളിലായി സൂക്ഷിച്ച മാലിന്യ സഞ്ചികള്‍ വലിയ ലോറിയില്‍ അന്യസംസ്ഥാനത്ത് കൊണ്ട് പോയി സംസ്‌കരിക്കുകയും റീസൈക്ലിങ് നടത്തുകയുമാണ് ചെയ്യുന്നത്. വടകര താലൂക്കിലെ ഏറാമല, പുറമേരി പഞ്ചായത്തുകളില്‍ ഈ പദ്ധതി നേരത്തെ വിജയകരമായി നടപ്പിലാക്കിയിരുന്നു. ഇപ്പോള്‍ എടച്ചേരി പഞ്ചായത്തിലും മാലിന്യ നിര്‍മാര്‍ജന പദ്ധതി നടപ്പിലാക്കുകയാണ്. ഇതിന്റെ ഭാഗമായി വീടുകളില്‍ നിന്ന് ശേഖരിച്ച മാലിന്യങ്ങള്‍ നിറച്ച ബാഗുകളാണ് വഴിയോരങ്ങളില്‍ കെട്ടിക്കിടക്കുന്നത്.