നീലേശ്വരം: ആനക്കൊമ്പില്‍ തീര്‍ത്ത കന്യാമറിയത്തിന്റെ ശില്‍പവുമായി പരപ്പ തെക്കുംചേരിയില്‍ ഹൗസിലെ സാബുകുമാറിനെ (40) വനംവകുപ്പ് സംഘം അറസ്റ്റ് ചെയ്തു. രഹസ്യ വിവരത്തിന്റെ അടിസ്ഥാനത്തില്‍ കാസര്‍കോട്, കണ്ണൂര്‍ ഫോറസ്റ്റ് ഫ്‌ളയിങ് സ്‌ക്വാഡ് റേഞ്ചുകളുടെ നേതൃത്വത്തിലായിരുന്നു അറസ്റ്റ്.
ശില്‍പവുമായി ബൈക്കില്‍ സഞ്ചരിക്കുകയായിരുന്ന പ്രതി ഞായറാഴ്ച ഉച്ചയ്ക്ക് ഒന്നോടെ ചെറുപുഴയുടെ സമീപത്തു വനംവകുപ്പിന്റെ പിടിയിലാവുകയായിരുന്നു. 160 ഗ്രാം തൂക്കമുള്ള ശില്‍പത്തിനു എട്ടു സെന്റിമീറ്റര്‍ നീളമുണ്ട്.
ആനക്കൊമ്പിനും ആനക്കൊമ്പില്‍ തീര്‍ത്ത സാധനങ്ങള്‍ക്കും മോഹവിലയായതിനാല്‍ വില നിര്‍ണയിച്ചില്ലെന്നു ഫോറസ്റ്റ് അധികൃതര്‍ പറഞ്ഞു.  പ്രതിയെ കോടതിയില്‍ ഹാജരാക്കി.