മുക്കം: അനിയന്ത്രിതമായ മാലിന്യ നിക്ഷേപംമൂലം വന്‍നാശം മുന്നില്‍ കാണുന്ന ഇരുവഴിഞ്ഞിപ്പുഴയെ രക്ഷിക്കാന്‍ പുഴയെ സ്‌നേഹിക്കുന്നവരുടെ വാട്ട്‌സ്ആപ്പ് കൂട്ടായ്മ രംഗത്ത്. വാട്ട്‌സ്ആപ്പ് കൂട്ടായ്മ 'എന്റെ സ്വന്തം ഇരുവഴിഞ്ഞി'യും സി.ഡബ്ല്യൂ.ആര്‍.ഡി.എം, സോഷ്യല്‍ ഫോറസ്ട്രി എന്നിവരുടെയും ചേര്‍ന്ന് ഇരുവഴിഞ്ഞിപ്പുഴയിലൂടെ നടത്തിയ അന്വേഷണ സഞ്ചാരം ശ്രദ്ധേയമായി.
സി.ഡബ്ല്യൂ.ആര്‍.ഡി.എം ശാസ്ത്രജ്ഞന്‍ ഡോ. മാധവന്‍ കോമത്ത് നയിച്ച അന്വേഷണ സഞ്ചാരം രാവിലെ എട്ടിന് കൂളിമാട് കടവില്‍ ചാത്തമംഗലം ഗ്രാമപഞ്ചായത്ത് പ്രസിഡന്റ് കെ.എസ് ബീന ഉദ്ഘാടനം ചെയ്തു. ചെയര്‍മാന്‍ പി.കെ.സി മുഹമ്മദ് അധ്യക്ഷനായി. കൊടിയത്തൂര്‍ ഗ്രാമപഞ്ചായത്ത് പ്രസിഡന്റ് സി.ടി.സി അബ്ദുല്ല ഫ്‌ളാഗ് ഓഫ് ചെയ്തു. കൊടിയത്തൂര്‍  തെയ്യത്തുംകടവ്, കക്കാടിലെ മാളിയേക്കല്‍, കാരശ്ശേരി ചീപ്പാന്‍കുഴി, കച്ചേരി, ചോണാട് എന്നീ കടവുകളില്‍ നല്‍കിയ സ്വീകരണങ്ങള്‍ക്കു ശേഷം മുക്കംകടവ് പാലത്തിനു സമീപം മാനവ സാംസ്‌കാരിക കേന്ദ്രത്തില്‍ സമാപിച്ചു. വിവിധ കേന്ദ്രങ്ങളില്‍ ബ്ലോക്ക് പഞ്ചായത്ത് വൈസ് പ്രസിഡന്റ് കെ.പി അബ്ദുറഹ്മാന്‍, കാരശ്ശേരി ഗ്രാമപഞ്ചായത്ത് പ്രസിഡന്റ് വി.കെ വിനോദ്, ഗ്രാമപഞ്ചായത്ത്, നഗരസഭാ അംഗങ്ങള്‍ അഭിവാദ്യം ചെയ്തു.
യാത്രാംഗങ്ങള്‍ ഇരുവഴിഞ്ഞി സംരക്ഷണവുമായി ബന്ധപ്പെട്ടു ജനങ്ങളുമായി അഭിപ്രായം ആരായുകയും നിര്‍ദേശങ്ങള്‍ തേടുകയും ചെയ്തു. യാത്രയ്ക്ക് ടി. അഹമ്മദ് സലീം, ഡോ. വിമല്‍, ഡോ. ഷാഫി, ബന്ന ചേന്ദമംഗല്ലൂര്‍, ജി. അബ്ദുല്‍ അക്ബര്‍, സി. മുഹമ്മദ് അശ്‌റഫ് നേതൃത്വം നല്‍കി. പുഴയുടെ വിവിധ തീരങ്ങളില്‍ ചെടികള്‍ നട്ടുപിടിപ്പിച്ചു. മാനവ കേന്ദ്രത്തില്‍ നടന്ന സമാപനച്ചടങ്ങ് ജില്ലാ പഞ്ചായത്തംഗം സി.കെ കാസിം ഉദ്ഘാടനം ചെയ്തു. നഗരസഭാ ചെയര്‍മാന്‍ വി. കുഞ്ഞന്‍ അധ്യക്ഷനായി. ഇരുവഴിഞ്ഞി ദിനാചരണം, പുഴയുടെ തീരങ്ങള്‍ ഹരിതാഭമാക്കല്‍ എന്നിവയ്ക്കു പദ്ധതികളാവിഷ്‌കരിച്ചു.