കല്‍പറ്റ: ആനക്കൊമ്പുമായി നാലു യുവാക്കള്‍ കല്‍പറ്റയില്‍ പിടിയിലായി. വനംവകുപ്പ് ഫഌയിങ് സക്വാഡ് റെയിഞ്ച് ഓഫീസര്‍ എം. പത്മനാഭന്റെ നേതൃത്വത്തില്‍ ബൈപാസില്‍ നടത്തിയ പരിശോധനയിലാണ് യുവാക്കള്‍ പിടിയിലായത്. കാപ്പും കൊല്ലി സ്വദേശി ജുനൈദ്(18), മേപ്പാടി പി.പി സവാദ്(19), ഇ.പി ഷിയാസലി (19), എം സുഭാഷ്( 26) എന്നിവരാണ് പിടിയിലായത്. 2.6 കി.ഗ്രാം തൂക്കം വരുന്ന ആനക്കൊമ്പാണ് പിടിച്ചെടുത്തത്.
വനംവകുപ്പിന് കിട്ടിയ വിവരത്തെ തുടര്‍ന്ന് കൊമ്പു വാങ്ങാനെന്ന വ്യാജേന യുവാക്കളെ വിളിച്ചു വരുത്തി പിടികൂടുകയായിരുന്നു. സുഭാഷിന്റെ കൈകളിലുണ്ടായിരുന്ന കൊമ്പ് വില്‍പനക്കായി മറ്റുള്ളവരെ ഏല്‍പിച്ചതാണെന്ന് ഉദ്യോഗസ്ഥര്‍ പറഞ്ഞു.