കോഴിക്കോട്: പ്രഥമ അക്ബര്‍ കക്കട്ടില്‍ പുരസ്‌കാരം എന്‍.എസ് മാധവന്. അക്ബര്‍ കക്കട്ടില്‍ ട്രസ്റ്റ് ഏര്‍പ്പെടുത്തിയ അരലക്ഷം രൂപയുടെ അവാര്‍ഡാണ് സാഹിത്യകാരന്‍ എന്‍.എസ് മാധവന്റെ കഥാസമാഹാരമായ പഞ്ച കന്യകകള്‍ക്ക് ലഭിച്ചത്. അക്ബര്‍ കക്കട്ടിലിന്റെ ഒന്നാം ചരമ വാര്‍ഷിക ദിനമായ 17ന് കോഴിക്കോട് ടൗണ്‍ഹാളില്‍ നടക്കുന്ന ചടങ്ങില്‍ എം.ടി വാസുദേവന്‍ നായര്‍ അവാര്‍ഡ് സമ്മാനിക്കും. ഡോ.എം.എം ബഷീര്‍ ചെയര്‍മാനായ ജൂറിയാണ് അവാര്‍ഡിനര്‍ഹമായ പുസ്തകം തിരഞ്ഞെടുത്തത്.
അനുസ്മരണ സമ്മേളനത്തില്‍ എം.പി വീരേന്ദ്രകുമാര്‍ അനുസ്മരണ പ്രഭാഷണം നടത്തും. അക്ബര്‍ കക്കട്ടിലിന്റെ അവസാന കൃതിയായ 'ഇനി വരില്ല പോസ്റ്റ്മാന്‍' എന്ന പുസ്തകത്തിന്റെ പ്രകാശനം വി.എം ചന്ദ്രന് നല്‍കി ഡോ.ഖദീജ മുംതാസ് നിര്‍വഹിക്കും.
എല്ലാ വര്‍ഷവും സംസ്ഥാന തലത്തില്‍ വിദ്യാര്‍ഥികള്‍ക്കായി കഥാ ക്യാംപുകളും നടത്തും. വാര്‍ത്താ സമ്മേളനത്തില്‍ ട്രസ്റ്റ് ചെയര്‍മാന്‍ ശത്രുഘ്‌നന്‍, സെക്രട്ടറി എ.കെ അബ്ദുല്‍ ഹക്കിം, എം.എസ് സജി പങ്കെടുത്തു.