മരട്: നെട്ടൂര്‍ കുണ്ടന്നൂര്‍ മരട് നഗരസഭയുടെ കടത്തുവഞ്ചിയില്‍ വിനോദ സഞ്ചാരികളുമായി വന്ന സ്പീഡ് ബോട്ട് ഇടിടിച്ച് കടത്തു വഞ്ചിക്കാരന്‍ പുഴയിലേക്ക് തെറിച്ചുവീണു. ഇന്നലെ ഉച്ചക്ക് 12ന് നെട്ടൂര്‍ കുണ്ടന്നൂര്‍ കടവില്‍ ആയിരുന്നു അപകടം. സംഭവംകണ്ട സമീപത്തെ ഫൈവ് സ്റ്റാര്‍ ഹോട്ടലിലെ ബോട്ട് ജീവനക്കാര്‍ ലൈഫ് ബോയയുമായെത്തിയാണ് കടത്തുവഞ്ചിക്കാരനെ രക്ഷപ്പെടുത്തിയത്. പെരുമ്പളം സ്വദേശി ഷണ്‍മുഖന്‍ (60) ആണ് പുഴയില്‍ വീണത്. വഞ്ചിയില്‍ മറ്റ് രണ്ടു യാത്രക്കാര്‍ ഉണ്ടായിരുന്നെങ്കിലും അവര്‍ക്ക് അപകടമൊന്നുംസംഭവിച്ചില്ല. പനങ്ങാട് ഭാഗത്തു നിന്നും രണ്ട് വിനോദ സഞ്ചാരികളുമായി വന്ന സ്പീഡ് ബോട്ടാണ് അപകടമുണ്ടാക്കിയത്. നഗരസഭാധികൃതര്‍ ഇത് സംബന്ധിച്ച് പനങ്ങാട് പോലീസില്‍ പരാതി നല്‍കി.