വണ്ടിപ്പെരിയാര്‍: കമ്പത്തു നിന്നും കഞ്ചാവുമായി ബൈക്കില്‍ വന്ന രണ്ട് യുവാക്കള്‍ ചെക്ക്‌പോസ്റ്റില്‍ നിര്‍ത്താതെ അമിത വേഗതയില്‍ പോകുന്നതിനിടെ ജീപ്പുമായി കൂട്ടിയിടിച്ചു.
ദേശീയപാതയില്‍ സ്പ്രിംഗ് വാലി കരയില്‍ വെച്ച് അപകടം സംഭവിച്ചത്. അപകടത്തില്‍ ഒരാള്‍ക്ക് പരിക്കേറ്റു. കുറവിലങ്ങാട് വൊട്ടുകുളം തറയില്‍ വീട്ടില്‍ ചെല്ലപ്പന്റെ മകന്‍ വിഷ്ണു(25), ഇല്ലം അള്ളുപുറത്ത് നാരായണന്റെ മകന്‍ യദുകൃഷ്ണന്‍(25) എന്നിവരാണ് അപകടത്തില്‍പ്പെട്ടത്.
പരിക്കേറ്റ യദുകൃഷ്ണനെ ആശുപത്രിയില്‍ പ്രവേശിപ്പിച്ചു. വണ്ടിപ്പെരിയാര്‍ എക്‌സൈസ് നടത്തിയ പരിശോധനയില്‍ ഇവരില്‍ നിന്ന് 100 ഗ്രാം കഞ്ചാവ് കണ്ടെടുത്തു. വിഷ്ണുവിനെ അറസ്റ്റ് ചെയ്ത് പീരുമേട് കോടതിയില്‍ ഹാജരാക്കി.
എക്‌സൈസ് ഇന്‍സ്‌പെക്ടര്‍ എസ് ഷാജി, ഉദ്യോഗസ്ഥരായ ജോബി, ജോസി, ജിജി, സുനില്‍കുമാര്‍, ബിനേഷ് കുമാര്‍ എന്നിവര്‍ റെയ്ഡില്‍ പങ്കെടുത്തു.