കോഡൂര്‍: ഒറ്റത്തറയിലെ ഗണ്ണേഴ്‌സ് എഫ്.സി ക്ലബിന്റെ ആഭിമുഖ്യത്തില്‍ നാട്ടിലെ മുതിര്‍ന്നവര്‍ക്ക് വിനോദയാത്ര സംഘടിപ്പിച്ചു. വിനോദ സ്ഥലങ്ങളൊന്നും സന്ദര്‍ശിച്ചിട്ടില്ലാത്ത, പരസഹായം കൂടാതെ യാത്ര ചെയ്യാന്‍ കഴിയാത്തത് കാരണം വീടുകളില്‍ ഒതുങ്ങികൂടുന്ന പ്രദേശത്തെ മുതിര്‍ന്നവരെയാണ് വിനോദയാത്രയിലേക്ക് തെരഞ്ഞെടുത്ത്.
മുതിര്‍ന്നവര്‍ ഒത്തുകൂടി പഴയകാല ഓര്‍മകള്‍ പങ്കുവച്ചപ്പോള്‍ വാര്‍ധക്യം യുവത്വത്തിലേക്ക് വഴിമാറി. മലമ്പുഴ ഉദ്യാനം, ടിപ്പു സുല്‍ത്താന്‍ കോട്ടയുള്‍പ്പെടെ പാലക്കാട് ജില്ലയിലെ വിവിധ സ്ഥലങ്ങളിലേക്കാണ് യാത്ര സംഘടിപ്പിച്ചത്. വിനോദയാത്രയുടെ ഫ്‌ളാഗ്ഓഫ് ബ്ലോക്ക് പഞ്ചായത്ത് അംഗം എം.കെ മുഹ്‌സിന്‍ നിര്‍വഹിച്ചു. ക്ലബ് പ്രസിഡന്റ് ഇര്‍ഷാദ് പാട്ടുപാറ അധ്യക്ഷനായി. ഗ്രാമപ്പഞ്ചായത്ത് അംഗം മുഹമ്മദ് മച്ചിങ്ങല്‍, ക്ലബ് ഭാരവാഹികളായ സിറാജ് പാട്ടുപാറ, മന്‍സൂര്‍ പൂവല്ലൂര്‍ തുടങ്ങിയവര്‍ സംസാരിച്ചു.