നിലമ്പൂര്‍: കോളജ് അധ്യാപികയെ കാണാനെത്തി എ.ടി.എം കാര്‍ഡും പഴ്‌സും ഉള്‍പ്പെടെ മോഷ്ടിച്ചു മുങ്ങിയ പ്രതി പൊലിസിന്റെ പിടിയിലായി. എടവണ്ണ പത്തപ്പിരിയം നല്ലാണി പടിക്കല്‍ പറമ്പില്‍ വിനു ആനന്ദിനെ (35) യാണ് എടക്കര എസ്.ഐ സുനില്‍ പുളിക്കല്‍ അറസ്റ്റ് ചെയ്തത്.
ഈ മാസം ഒന്‍പതിന് ചുങ്കത്തറ മാര്‍ത്തോമ കോളജിലെ പ്രൊഫസറെ കാണാനെന്നു പറഞ്ഞ് കോളജിലെ ഇക്കണോമിക്‌സ് വിഭാഗം ഓഫിസില്‍ കയറിയ ഇയാള്‍ ഒരു അധ്യാപികയുടെ ബാഗില്‍നിന്നു പണവും എ.ടി.എം, പാന്‍ കാര്‍ഡുകളും അടങ്ങിയ പേഴ്‌സും മോഷ്ടിച്ച് രക്ഷപ്പെടുകയായിരുന്നു. സി.സി.ടി.വി ദൃശ്യങ്ങളില്‍ പ്രതിയുടെ ചിത്രം പതിഞ്ഞതിനാല്‍ ഇയാളെ കണ്ടെത്താന്‍ എളുപ്പമായി. മഞ്ചേരി ബസ് സ്റ്റാന്‍ഡില്‍വച്ചാണ് ഇയാള്‍ പിടിയിലായത്.
മോഷ്ടിച്ച പേഴ്‌സ് മഞ്ചേരി കംഫര്‍ട്ട് സ്റ്റേഷന്‍ പരിസരത്തുനിന്നും എ.ടി.എം, പാന്‍ കാര്‍ഡുകള്‍ റോഡരികിലെ മാലിന്യക്കൂനയില്‍നിന്നും കണ്ടെടുത്തു. എ.ടി.എം കാര്‍ഡ് ഉപയോഗിച്ച് നാലായിരം രൂപ പിന്‍വലിക്കുകയും ചെയ്തിരുന്നു. എ.ടി.എം കാര്‍ഡ് നഷ്ടപ്പെട്ടതോടെ ബ്ലോക്ക് ചെയ്തതിനാല്‍ കൂടുതല്‍ പണം നഷ്ടപ്പെട്ടില്ല. 2016 നവംബറില്‍ മഞ്ചേരി ട്രിനിറ്റി കോളജില്‍നിന്നു പാണ്ടിക്കാട് ബസ് സ്റ്റാന്‍ഡിലെ ട്യൂഷന്‍ സെന്ററില്‍നിന്നു സമാന രീതിയില്‍ മോഷണം നടത്തിയിട്ടുണ്ട്.
തട്ടിപ്പുകേസില്‍ വണ്ടൂര്‍ പൊലിസിന്റെ പിടിയിലായ പ്രതി രണ്ടുവര്‍ഷം മുന്‍പു കണ്ണൂര്‍ സെന്‍ട്രല്‍ ജയിലില്‍ ശിക്ഷയനുഭവിച്ചിട്ടുണ്ട്. എടക്കര സി.ഐ പി.കെ സന്തോഷിന്റെ നേതൃത്വത്തില്‍ നടന്ന അന്വേഷണത്തില്‍ എസ്.ഐക്കു പുറമേ എ.എസ്.ഐ എം. അസൈനാര്‍, സി.പി.ഒമാരായ അബൂബക്കര്‍, കെ. ഷിഫിന്‍, സുനില്‍, സലീല്‍ബാബു എന്നിവര്‍ പങ്കെടുത്തു. പ്രതിയെ കോടതി റിമാന്‍ഡ് ചെയ്തു,