ഹൊബാര്‍ട്: ഗ്ലന്‍ മാക്‌സ്‌വെല്ലിന്റെ ഓള്‍റൗണ്ട് മികവില്‍ ത്രിരാഷ്ട്ര ടി20 പോരാട്ടത്തില്‍ ആസ്‌ത്രേലിയക്ക് തുടര്‍ച്ചയായ രണ്ടാം ജയം. ബൗള്‍ ചെയ്തപ്പോള്‍ മൂന്ന് വിക്കറ്റെടുത്ത മാക്‌സ്‌വെല്‍ ബാറ്റിങിനിറങ്ങി പുറത്താകാതെ സെഞ്ച്വറി അടിച്ചെടുത്ത് ഓസീസിനെ സുരക്ഷിതമായി വിജയ തീരത്തെത്തിച്ചു.
ആദ്യ മത്സരത്തില്‍ ന്യൂസിലന്‍ഡിനെ ഏഴ് വിക്കറ്റിന് തകര്‍ത്ത ഓസീസ് രണ്ടാം പോരാട്ടത്തില്‍ ഇംഗ്ലണ്ടിനെ അഞ്ച് വിക്കറ്റിനാണ് വീഴ്ത്തിയത്. ആദ്യം ബാറ്റ് ചെയ്ത ഇംഗ്ലണ്ട് നിശ്ചിത 20 ഓവറില്‍ ഒന്‍പത് വിക്കറ്റ് നഷ്ടത്തില്‍ 155 റണ്‍സെടുത്തപ്പോള്‍ ആസ്‌ത്രേലിയ 18.3 ഓവറില്‍ അഞ്ച് വിക്കറ്റ് മാത്രം നഷ്ടപ്പെടുത്തി 161 റണ്‍സ് അടിച്ചെടുത്താണ് വിജയം സ്വന്തമാക്കിയത്. 58 പന്തില്‍ പത്ത് ഫോറും നാല് സിക്‌സും തൂക്കി മാക്‌വെല്‍ പുറത്താകാതെ 103 റണ്‍സ് അടിച്ചെടുത്ത് ടീമിനെ അനായാസം വിജയത്തിലേക്ക് നയിച്ചു. അന്താരാഷ്ട്ര ടി20യില്‍ താരം നേടുന്ന രണ്ടാം ശതകമാണിത്. ഓപണര്‍ ഡിയാര്‍സി ഷോര്‍ട് 20 പന്തില്‍ രണ്ട് വീതം സിക്‌സും ഫോറും പറത്തി 30 റണ്‍സുമായി മാക്‌വെലിനെ പിന്തുണച്ചു. ഓസീസിന് വിജയത്തിലേക്കാവശ്യമായ റണ്‍സിന്റെ ഭൂരിഭാഗവും മാക്‌സ്‌വെല്‍ ഒറ്റയ്ക്ക് തന്നെ കണ്ടെത്തി. ടീം വിജയത്തിലെത്തുമ്പോള്‍ അലക്‌സ് കേരി അഞ്ച് റണ്‍സുമായി പുറത്താകാതെ മക്‌സ്‌വെല്ലിന് കൂട്ടായി ക്രീസിലുണ്ടായിരുന്നു.
ടോസ് നേടി ഓസീസ് നായകന്‍ ഡേവിഡ് വാര്‍ണര്‍ ഇംഗ്ലണ്ടിനെ ബാറ്റിങിന് വിടുകയായിരുന്നു. 36 പന്തില്‍ രണ്ട് സിക്‌സും അഞ്ച് ഫോറും സഹിതം 50 റണ്‍സെടുത്ത ഡേവിഡ് മാലനാണ് ടോപ് സ്‌കോറര്‍. 22 റണ്‍സ് വീതമെടുത്ത് ഹെയ്ല്‍സ്, ക്യാപ്റ്റന്‍ ഇയാന്‍ മോര്‍ഗന്‍ എന്നിവരും ഭേദപ്പെട്ട പ്രകടനം പുറത്തെടുത്തു. മാക്‌സ്‌വെല്‍ രണ്ടോവറില്‍ പത്ത് റണ്‍സ് മാത്രം വഴങ്ങി മൂന്ന് വിക്കറ്റുകള്‍ വീഴ്ത്തി ഇംഗ്ലണ്ടിനെ വെട്ടിലാക്കി. മാക്‌സ്‌വെല്‍ തന്നെയാണ് കളിയിലെ കേമന്‍.