ന്യൂഡല്‍ഹി: സുപ്രിംകോടതി മുന്‍ ചീഫ് ജസ്റ്റിസും മലയാളിയുമായ കെ.ജി ബാലകൃഷ്ണന്‍ സ്വത്തുക്കള്‍ മറച്ചുവച്ചിട്ടില്ലെന്ന് ആദായനികുതി വകുപ്പ്.
സുപ്രിംകോടതി ജഡ്ജിയായിരിക്കെ ജസ്റ്റിസ് ബാലകൃഷ്ണനും ബന്ധുക്കളും വരുമാനം മറച്ചുവച്ചെന്ന കേസില്‍ ആദായനികുതി വകുപ്പ് സുപ്രിംകോടതിയില്‍ സമര്‍പ്പിച്ച റിപ്പോര്‍ട്ടിലാണ് അദ്ദേഹത്തിന് ശുദ്ധിപത്രം ലഭിച്ചത്.
എന്നാല്‍ അദ്ദേഹത്തിന്റെ ബന്ധുക്കള്‍ കോടികളുടെ സ്വത്തുവിവരങ്ങള്‍ മറച്ചുവച്ചതായി ആദായനികുതി വകുപ്പ് സുപ്രിംകോടതിയെ അറിയിച്ചു.
2005 - 2013 കാലത്ത് ബാലകൃഷ്ണന്റെ മകള്‍, മരുമക്കള്‍, സഹോദരന്‍ എന്നിവര്‍ സമ്പാദിച്ച സ്വത്തുക്കളാണ് മറച്ചുവച്ചത്. ഇതിന്റെ വ്യക്തമായ കണക്കുകളും റിപ്പോര്‍ട്ടിലുണ്ട്. ഈ സ്വത്തുക്കളുടെ വിവരങ്ങളെല്ലാം കുടുംബം മറച്ചുവച്ചതായും പിന്നീട് ആദായനികുതി വകുപ്പ് അന്വേഷണം നടത്തിയപ്പോള്‍ നികുതിയടച്ച് കേസ് അവസാനിപ്പിച്ചതായും റിപ്പോര്‍ട്ട് പറയുന്നു. സംഭവം അന്വേഷിക്കാന്‍ പ്രത്യേക സംഘത്തെ (എസ്.ഐ.ടി) നിയോഗിക്കണമെന്നാവശ്യപ്പെട്ട് മുതിര്‍ന്ന അഭിഭാഷകന്‍ പ്രശാന്ത് ഭൂഷണിന്റെ നേതൃത്വത്തിലുള്ള കോമണ്‍ കോസ് എന്ന സന്നദ്ധ സംഘടന സുപ്രിംകോടതിയില്‍ പൊതുതാല്‍പര്യ ഹരജി സമര്‍പ്പിച്ചിട്ടുണ്ട്.
ജസ്റ്റിസ് ബാലകൃഷ്ണന്റെ മരുമകനും യൂത്ത് കോണ്‍ഗ്രസ് നേതാവുമായ ശ്രീനിജന്റെ സ്വത്ത് 2009- 10 കാലത്ത് 26.61 ലക്ഷം എന്നാണ് വെളിപ്പെടുത്തിയത്. എന്നാലിത് 1.64 കോടിയാണെന്ന് പിന്നീട് കണ്ടെത്തി. 2010- 11 കാലത്ത് 47.47 ലക്ഷത്തിന്റെ സ്വത്ത് വെളിപ്പെടുത്തിയപ്പോള്‍ യഥാര്‍ഥ സ്വത്ത് 2.11 കോടിയായിരുന്നു.
ശ്രീനിജന്‍ വെളിപ്പെടുത്തിയ വരുമാനം 22.06 ലക്ഷമായിരുന്നെങ്കിലും 1.04 കോടിയായിരുന്നു യഥാര്‍ഥ കണക്കെന്നും കണ്ടെത്തി. തുടര്‍ന്ന് നികുതിയും അതിന്റെ പലിശയുമായി 1.02 കോടി ഇയാള്‍ പിഴയടക്കുകയുമുണ്ടായി.