നാദാപുരം: ഹൈടെക് കോളജ് സ്ഥാപകന്‍ പരേതനായ പി.കെ മൊയ്തുഹാജിയുടെ സ്മരണക്കായി രണ്ട@ു ദിവസങ്ങളിലായി നാദാപുരം ഇന്‍ഡോര്‍ സ്റ്റേഡിയത്തില്‍ നടന്ന ഇന്റര്‍ കൊളീജിയറ്റ് വോളിബോള്‍ മേള സമാപിച്ചു.
മത്സരത്തില്‍ കുറ്റ്യാടി ഐഡിയല്‍ കോളജ് ഏക പക്ഷീയമായ മൂന്നു സെറ്റുകള്‍ക്ക് മടപ്പള്ളി ഗവ. കോളജിനെ പരാജയപ്പെടുത്തി ജേതാക്കളായി. സമാപന സമ്മേളനത്തില്‍ ഇന്ത്യന്‍ ഫുട്‌ബോള്‍ ടീം മുന്‍ ക്യാപ്റ്റന്‍ ഐ.എം വിജയന്‍ മുഖ്യാതിഥിയായി. ജേതാക്കള്‍ക്കുള്ള ട്രോഫി അദ്ദേഹം സമ്മാനിച്ചു. ഹൈടെക് കോളജ് പ്രിന്‍സിപ്പല്‍ പ്രൊഫ. കെ.കെ മഹ്മൂദ് അധ്യക്ഷനായി. ക്യാഷ് പ്രൈസ് ഹൈടെക് ഗ്രൂപ്പ് ചെയര്‍പേഴ്‌സണ്‍ ആയിഷാ മൊയ്തു, മാനേജിങ് ഡയറക്ടര്‍ അമര്‍, മൊയ്തു എന്നിവര്‍ നല്‍കി.
സംഘാടകസമിതി ചെയര്‍മാന്‍ അബ്ബാസ് കണേക്കല്‍, പഞ്ചായത്ത് സ്ഥിരംസമിതി ചെയര്‍മാന്‍ ബംഗ്ലത്ത് മുഹമ്മദ്, സി.കെ നാസര്‍, എം.കെ അഷ്‌റഫ്, യൂനിയന്‍ ചെയര്‍മാന്‍ പി.കെ ഹൈസം സംസാരിച്ചു. സമാപന സമ്മേളനത്തിന് ശേഷം നടന്ന സൗഹൃദ മത്സരത്തില്‍ തൃപ്രയാര്‍ വോളി അക്കാദമി എം.ജി യൂനിവേഴ്‌സിറ്റി ടീമുമായി ഏറ്റുമുട്ടി.