കല്‍പ്പറ്റ: മാനുഷിക മൂല്യങ്ങള്‍ക്ക് വില കല്‍പ്പിച്ച മുഹമ്മദ് നബിയുടെ സന്ദേശങ്ങള്‍ കൈമാറിയും ഹുദൈബിയയുടെ പ്രസക്തി വിളിച്ചോതിയും അഞ്ച് ദിവസങ്ങളിലായി നടന്നുവന്ന മദീനാപാഷന്‍ സന്ദേശ യാത്രക്ക് ഉജ്വല പരിസമാപ്തി. ഇനി ചരിത്രം രചിച്ച് മീനങ്ങാടി ഹുദൈബിയയില്‍ ആയിരങ്ങള്‍ സംഗമിക്കും. നാളെ മുതല്‍ ആരംഭിക്കുന്ന എസ്.കെ.എസ്.എസ്.എഫ് ജില്ലാ സമ്മേളനം പ്രവര്‍ത്തകരില്‍ ആത്മീയതയും ആവേശവും നിറക്കും. അശരണര്‍ക്ക് ആശ്വാസമായും വിദ്വംസക ശക്തികള്‍ക്ക് താക്കീതായും മാറി സന്ദേശയാത്ര. ഇന്നലെ രാവിലെ ചുണ്ടേലില്‍ മുസ്‌ലിംലീഗ് കല്‍പ്പറ്റ മണ്ഡലം ട്രഷറര്‍ സലീം മേമന ഉദ്ഘാടനം ചെയ്തു. എസ്.വൈ.എസ് ജില്ലാ സെക്രട്ടറി ശംസുദ്ധീന്‍ റഹ്മാനി പ്രമേയപ്രഭാഷണം നടത്തി. വൈത്തിരി, പൊഴുതന, ആറാം മൈല്‍, പിണങ്ങോട് എന്നിവിടങ്ങളില്‍ പര്യടനം നടത്തിയ ജാഥ കല്‍പ്പറ്റയില്‍ സമാപിച്ചു. സലീം മുസ്‌ലിയാര്‍ മണ്ണാര്‍ക്കാട് ഉദ്ഘാടനം ചെയ്തു. കെ മമ്മൂട്ടി നിസാമി മുഖ്യപ്രഭാഷണം നടത്തി. മുഹിയുദ്ധീന്‍കുട്ടി യമാനി, അബ്ദുല്‍ ലത്തീഫ് വാഫി, അലി യമാനി, ആസിഫ് വാഫി, സാജിദ് മൗലവി, മുജീബ് ഫൈസി, മുസ്തഫ തരുവണ, ശിഹാബ് റിപ്പണ്‍, മിഖ്ദാദ് അഹ്‌സനി, മഷ്ഹൂദ് മൗലവി, ഫഹീം തരുവണ, റഷീദ് വെങ്ങപ്പള്ളി, ഷാജഹാന്‍ വാഫി, അബ്ബാസ് വാഫി, സൈനുല്‍ ആബിദീന്‍ തങ്ങള്‍, ജുനൈദ്, അജ്മല്‍, മിഥ്‌ലാജ്, അസ്‌ലം, റാസിഖ്, ഖാലിദ് സംസാരിച്ചു.