കൊച്ചി: ഈ വര്‍ഷം സെപ്റ്റംബറില്‍ കൊച്ചിയില്‍ നടക്കുന്ന കേരള ട്രാവല്‍ മാര്‍ട്ട് 2018ന്റെ റഷ്യയിലെ ഗുഡ്‌വില്‍ അംബാസിഡറായി യൂറേഷ്യ ബ്യൂട്ടിക്വീന്‍ ജേതാവ് യാന ഫിലിപ്പോവയെ തീരുമാനിച്ചു.
ടൂറിസം മേഖലയില്‍ ഇരു രാജ്യങ്ങളും പരസ്പരസഹകരണം വര്‍ധിപ്പിക്കാന്‍ ഊന്നല്‍ നല്‍കുന്നതാണ് തീരുമാനം.
പ്രധാനമന്ത്രി നരേന്ദ്രമോദിയും റഷ്യന്‍ പ്രസിഡന്റ് വ്‌ളാദിമര്‍ പുടിനും 2018 ഇന്ത്യ-റഷ്യ ടൂറിസം വര്‍ഷമായി നിശ്ചയിച്ചിരുന്നു. ഈ പശ്ചാത്തലത്തില്‍ റഷ്യയാകും കെ.ടി.എം 2018ന്റെ പ്രധാന ശ്രദ്ധാകേന്ദ്രം.
ക്ഷണം യാന ഫിലിപ്പോവ സ്വീകരിച്ചതായി കെ.ടി.എം സൊസൈറ്റി പ്രസിഡന്റ് ബേബി മാത്യു വാര്‍ത്താസമ്മേളനത്തില്‍ അറിയിച്ചു.
യാന ഗുഡ്‌വില്‍ അംബാസിഡറാകുന്നതോടെ റഷ്യയില്‍നിന്ന് കെ.ടി.എമ്മില്‍ കൂടുതല്‍ പങ്കാളിത്തം ഉണ്ടാകുമെന്ന് പ്രതീക്ഷിക്കുന്നതായി അദ്ദേഹം അറിയിച്ചു.
യാനയും കെ.ടി.എം സെക്രട്ടറി ജോസ് പ്രദീപ്, ട്രഷറര്‍ ജി. ഗോപിനാഥന്‍, കെ.ടി.എം മുന്‍ പ്രസിഡന്റ് എബ്രഹാം ജോര്‍ജ് എന്നിവരും വാര്‍ത്താസമ്മേളനത്തില്‍ സന്നിഹിതരായിരുന്നു.