എടക്കര: മൂത്തേടം മാവോയിസ്റ്റ് വെടിവയ്പ്പ് നടന്ന കരുളായി വനം മേഖലയോട് ചേര്‍ന്നിട്ടുള്ള കല്‍ക്കുളത്ത് വച്ച് മാവോയിസ്‌റ്റെന്ന് സംശയിക്കുന്ന യുവാവിനെ പൊലിസ് കസ്റ്റഡിയിലെടുത്തു.
ഇന്നലെ രാത്രി ഏഴരയോടെയാണ് സംഭവം. കല്‍ക്കുളത്തിനടുത്തുള്ള നെല്ലിക്കുത്ത് അങ്ങാടില്‍ നിന്ന് ഓട്ടോയില്‍ കയറിയ യുവാവ് കല്‍ക്കുളത്തെത്തിയപ്പോള്‍ ഇറങ്ങിയോടുകയായിരുന്നു.
നാട്ടുകാര്‍ ചേര്‍ന്ന് പിടികൂടി ചോദ്യം ചെയ്തപ്പോള്‍ ഇയാളുടെ കൈയില്‍ നിന്നും തമിഴിലുള്ള രണ്ട് കത്തുകള്‍ കണ്ടെടുത്തു. സംശയം തോന്നിയ ഇയാളെ എടക്കര പൊലിസിലേക്ക് വിവരമറിയിച്ചതിനെത്തുടര്‍ന്ന് പൊലിസെത്തി കസ്റ്റഡിയിലെടുക്കുകയായിരുന്നു.
ജീപ്പില്‍ കയറ്റുമ്പോള്‍ മാവോയിസ്റ്റ് അനുകൂല മുദ്രാവാക്യം മുഴക്കിയതായി നാട്ടുകാര്‍ പറഞ്ഞു. കത്തിനു പുറമെ പതിനായിരം രൂപയോളം ഇയാളുടെ പക്കലുണ്ടായിരുന്നു.
കോയമ്പത്തൂര്‍ സ്വദേശിയാണെന്നും അയ്യപ്പന്‍ എന്നാണു പേരെന്നും നാട്ടില്‍ സഹോദരനെ കാണാനെത്തിയതാണെന്നും ഇയാള്‍ പറഞ്ഞതായി പൊലിസ് അറിയിച്ചു. നിലമ്പൂര്‍ പൊലിസ് കാംപില്‍ ഇയാളെ ചോദ്യം ചെയ്തു വരികയാണ്.