സിയൂള്‍: പോങ്ച്യാങില്‍ നടക്കുന്ന ശൈത്യകാല ഒളിംപിക്‌സിന്റെ ഉദ്ഘാടന ചടങ്ങിനിടെ ഇന്റര്‍നെറ്റ് പ്രവര്‍ത്തനം നിലച്ചത് സംബന്ധിച്ച് ദക്ഷിണ കൊറിയ അന്വേഷണം ആരംഭിച്ചു. വെള്ളിയാഴ്ച പ്രാദേശിക സമയം രാത്രി 7.15 ഓടെയാണ് ഗെയിംസിന്റെ ആഭ്യന്തര ഇന്റര്‍നെറ്റ്, വൈഫൈ സേവനങ്ങള്‍ പ്രവര്‍ത്തന രഹിതമായത്. ഇന്നലെ ഉച്ചവരെ ഇന്റര്‍നെറ്റ് സേവനങ്ങള്‍ പുനസ്ഥാപിച്ചില്ലെന്ന് ഒളിംപിക്‌സ് സംഘാടക സമതി അംഗം പറഞ്ഞു.
ദക്ഷിണ കൊറിയന്‍ പ്രതിരോധ മന്ത്രാലയത്തിലെ പ്രതിനിധികള്‍, സൈബര്‍ സുരക്ഷാ അംഗങ്ങള്‍, മറ്റു മന്ത്രാലയങ്ങളിലെ നാലു പേര്‍ എന്നിവര്‍ ഉള്‍പ്പെട്ട സംഘത്തെയാണ് അന്വേഷണത്തിന് ഏല്‍പ്പിച്ചത്.
എന്നാല്‍ ഉദ്ഘാടന പരിപാടിയെ സൈബര്‍ അക്രമണം ബാധിച്ചില്ലെന്ന് അധികൃതര്‍ പറഞ്ഞു. ഉത്തരകൊറിയന്‍ ഭരണാധികാരി കിം ജോങ് ഉന്നിന്റെ സഹോദരി കിം യോ ജോങ്, ദക്ഷിണ കൊറിയന്‍ പ്രസിഡന്റ് മൂണ്‍ ജോ, യു.എസ് വൈസ് പ്രസിഡന്റ് മൈക്ക് പെന്‍സ് എന്നിവര്‍ ഒളിംപിക്‌സിന്റെ ഉദ്ഘാടന പരിപാടിയില്‍ പങ്കെടുത്തിരുന്നു.