കിളിമാനൂര്‍: പുളിമാത്ത് പഞ്ചായത്തിലെ കൊടുവഴന്നൂര്‍ പന്തുവിള മണ്ണടി മാടന്‍നട പ്രദേശത്തുണ്ടായ തീപിടുത്തത്തില്‍ ഇരുനൂറിലധികം റബര്‍ മരങ്ങള്‍ കത്തിനശിച്ചു.കഴിഞ്ഞദിവസം രാവിലെ പതിനൊന്നു മണിയോടെയായിരുന്നു സംഭവം. മാടന്‍നടക്ഷേത്രത്തിന് സമീപത്തെ ചൂളയുടെ ഭാഗത്ത് നിന്നുണ്ടായ തീ ശക്തമായ കാറ്റില്‍ റബര്‍തോട്ടത്തിലേക്ക് വ്യാപിക്കുകയായിരുന്നു. മണ്ണടി സ്വദേശികളായ വാസുദേവന്‍, സുദേവന്‍, വിലാസിനി, സുഹാസ് എന്നിവരുടെ പുരയിടങ്ങളിലെ റബര്‍മരങ്ങളാണ് കത്തിയമര്‍ന്നത്.
ആറ്റിങ്ങലില്‍ നിന്ന് ഫയര്‍ഫോഴ്‌സ് സംഘമെത്തിയാണ് തീ നിയന്ത്രണവിധേയമാക്കിയത്. ചൊവ്വാഴ്ച രാത്രി പത്തുമണിയോടെ അയിലംകടവ് കരിമ്പുവിള ഭാഗത്തും തീ പടര്‍ന്നിരുന്നു. രാത്രി നദിയില്‍ മീന്‍പിടിക്കാന്‍ വന്നവരാരോ ഉപേക്ഷിച്ച സിഗററ്റ് കുറ്റിയില്‍ നിന്നാണ് തീ പിടിച്ചതെന്നു കരുതുന്നു.