തിരൂരങ്ങാടി: കൊടിഞ്ഞി പുല്ലാണി ഫൈസലിനെ വെട്ടിക്കൊലപ്പെടുത്തിയ കേസില്‍ രണ്ടുപ്രതികളെയും കൂടുതല്‍ ചോദ്യം ചെയ്യുന്നതിനായി പൊലിസ് കസ്റ്റഡിയില്‍ വാങ്ങി. ഫൈസലിന്റെ വയറിന് കുത്തിയതായി പറയപ്പെടുന്ന ആര്‍.എസ്.എസ് പ്രവര്‍ത്തകന്‍ തിരൂര്‍ ആലത്തിയൂര്‍ കുട്ടിച്ചാത്തന്‍പടി കുണ്ടില്‍ ബിബിന്‍(26), സംഭവത്തിന്റെ പ്രധാന സൂത്രധാരനും ആര്‍.എസ്.എസിന്റെ തിരൂര്‍ താലൂക്ക് സഹ കാര്യവാഹകുമായ തിരൂര്‍ തൃക്കണ്ടിയൂര്‍ മഠത്തില്‍ നാരായണന്‍(47) എന്നിവരെയാണ് അന്വേഷണസംഘം ഇന്നലെ കസ്റ്റഡിയില്‍ വാങ്ങിയത്. രണ്ടു പ്രതികളുമായി പൊലിസ് ഇന്ന് തെളിവെടുപ്പ് നടത്തും. ഇന്നലെ തെളിവെടുക്കാനായിരുന്നു അന്വേഷണ സംഘം തീരുമാനിച്ചിരുന്നത്. ഇതിനുള്ള സന്നാഹങ്ങളും ഒരുക്കിയിരുന്നു. എന്നാല്‍ ചില സാങ്കേതിക കാരണങ്ങളാല്‍ മാറ്റിവയ്ക്കുകയായിരുന്നു. നാലു ദിവസത്തേക്കാണ് പ്രതികളെ പൊലിസ് കസ്റ്റഡിയില്‍ ലഭിച്ചിരിക്കുന്നത്.
ഫൈസലിനെ കുത്താന്‍ ഉപയോഗിച്ച ആയുധമാണ് തിരൂരില്‍ നിന്നു കണ്ടെടുക്കാനുള്ളത്. ഗൂഢാലോചനയുടെ ഭാഗമായി കൊടിഞ്ഞിയില്‍ സന്ദര്‍ശനം നടത്തിയ സ്ഥലങ്ങളും നാരായണനില്‍നിന്നു തെളിവെടുക്കും.
രണ്ടു പ്രതികളെയും വ്യാഴാഴ്ച തിരൂര്‍ സബ്ജയിലില്‍ തിരിച്ചറിയല്‍ പരേഡിന് വിധേയമാക്കുകയും,ആറു സാക്ഷികള്‍ രണ്ടു പ്രതികളെയും തിരിച്ചറിയുകയും ചെയ്തിരുന്നു.