കല്‍പ്പറ്റ: കാല്‍പ്പന്ത് കളിയിലെ കൗമാരപ്രതിഭകള്‍ക്ക് അബൂദാബിയിലെ അല്‍ ഇത്തിഹാദ്, മേപ്പാടി അരപ്പറ്റയിലെ നോവ ഫുട്‌ബോള്‍ അക്കാദമികള്‍ സംയുക്തമായി പ്രത്യേക പരിശീലനം നല്‍കുന്നു. അല്‍ ഇത്തിഹാദ് അക്കാദമി കണ്ണൂര്‍, വയനാട് ജില്ലകളില്‍ ആരംഭിച്ചതും ഇതര ജില്ലകളിലടക്കം ഉടന്‍ തുടങ്ങുന്നതുമായ പരിശീലന കേന്ദ്രങ്ങളില്‍നിന്നു തെരഞ്ഞെടുക്കുന്ന കളിക്കാരെയാണ് പ്രത്യേകം പരിശീലിപ്പിക്കുക. ഇതിനായി എലീറ്റ് ബാച്ചിനു രൂപം നല്‍കും. താരങ്ങളെ 14, 16, 18, 19 വയസിനു താഴെയുള്ള നാല് വിഭാഗങ്ങളായി തിരിച്ചായിരിക്കും എലീറ്റ് ബാച്ചില്‍ പരിശീലനം. ഓരോ വിഭാഗത്തിലും 25 താരങ്ങള്‍ ഉണ്ടാകും.