ദോഹ: ദിവസങ്ങളായി തുടരുന്ന കനത്ത മഴ കാരണം സമയക്രമം തെറ്റിയ പതിനഞ്ചാമത് ഖത്തര്‍ ടോട്ടല്‍ ഓപ്പണ്‍ മത്സരത്തില്‍ കിരീടം ചെക്ക് റിപ്പബ്ലിക്കിന്റെ കരോലിന പ്ലിസ്‌ക്കോവയ്ക്ക്.

മഴ നിന്ന ശനിയാഴ്ച ഖലീഫ ടെന്നീസ് ആന്റ് സ്‌ക്വാഷ് കോംപ്ലക്‌സിലെ സെന്റര്‍കോര്‍ട്ടില്‍ വൈകുന്നേരം നടന്ന കലാശപ്പോരാട്ടത്തില്‍ ഡെന്‍മാര്‍ക്കിന്റെ കരോലിന്‍ വോസ്‌നിയാക്കിയെ നേരിട്ടുള്ള സെറ്റുകള്‍ക്ക് പരാജയപ്പെടുത്തിയാണ് പ്ലിസ്‌ക്കോവ ആദ്യമായി ഖത്തര്‍ ഓപ്പണ്‍ കിരീടം സ്വന്തമാക്കുന്നത്. സ്‌കോര്‍ 63, 64.

പ്ലിസ്‌ക്കോവയുടെ കരിയറിലെ എട്ടാം കിരീടനേട്ടമാണിത്. പ്ലിസ്‌ക്കോവയ്ക്ക് ഫാല്‍ക്കണ്‍ മാതൃകയിലുള്ള ട്രോഫി സമ്മാനിച്ചു. മത്സരത്തിലുടനീളം സമ്പൂര്‍ണ ആധിപത്യം പുലര്‍ത്തിയാണ് പ്ലിസ്‌ക്കോവ സീസണിലെ തന്റെ രണ്ടാം കിരീടം സ്വന്തമാക്കിയത്. ഖത്തര്‍ ടോട്ടല്‍ ഓപ്പണ്‍ കലാശപ്പോരാട്ടം കാണാന്‍ അമീര്‍ ശൈഖ് തമീം ബിന്‍ ഹമദ് അല്‍താനിയെത്തി.

ഖലീഫ രാജ്യാന്തര ടെന്നീസ് ആന്റ് സ്‌ക്വാഷ് കോംപ്ലക്‌സിലെ സെന്റര്‍കോര്‍ട്ടിലായിരുന്നു മത്സരം. അമീറിനു പുറമെ നിരവധി മന്ത്രിമാര്‍ ശൈഖുമാര്‍, നയതന്ത്രദൗത്യത്തലവന്‍മാര്‍, മുതിര്‍ന്ന ഉദ്യോഗസ്ഥര്‍ എന്നിവരും ഫൈനല്‍ വീക്ഷിക്കാനെത്തിയിരുന്നു.അമേരിക്കയുടെ അബിഗെയ്ല്‍ സ്പിയേഴ്‌സ് സ്ലൊവേനിയയുടെ കാതറീന സ്രെബോട്ട്‌നിക് സഖ്യം ഡബിള്‍സ് കിരീടം സ്വന്തമാക്കി.

കസാഖിസ്ഥാന്റെ യറോസ്ലാവ ഷ്‌വെദോവ ഉക്രെയ്‌നിന്റെ ഓള്‍ഗ സാവ്ചുക് സഖ്യത്തെ നേരിട്ടുള്ള സെറ്റുകള്‍ക്കാണ് അമേരിക്കന്‍സ്ലൊവേനിയന്‍ സഖ്യം പരാജയപ്പെടുത്തിയത്, സ്‌കോര്‍ 63, 76.