കൊച്ചി: പ്രമുഖ മലയാള നടിയെ തട്ടിക്കൊണ്ടുപോയി അതിക്രമിച്ച കേസില്‍ രണ്ടു പേര്‍ കൂടി പിടിയില്‍. ആലുവ റൂറല്‍ എസ്്.പിയുടെ നേതൃത്വത്തിലുള്ള അന്വേഷണ സംഘം കോയമ്പത്തൂരില്‍ നിന്നാണ് പ്രതികളെ പിടികൂടിയത്. ഇന്നലെ അര്‍ധരാത്രിയോടെയാണ് ഇവരെ സംഘം അറസ്റ്റ് ചെയ്തത്. കേസില്‍ ഇനി മുഖ്യപ്രതിയെ കൂടി പിടികൂടാനുണ്ട്.

വെള്ളിയാഴ്ച രാത്രി തൃശൂരില്‍ നിന്ന് എണാകുളത്തേക്ക് ഷൂട്ടിങ്ങ് കഴിഞ്ഞ് മടങ്ങുമ്പോഴായിരുന്നു നടിയെ സംഘം തട്ടിക്കൊണ്ടുപോയത്. തന്റെ കാറില്‍ അതിക്രമിച്ച് കയറി ഉപദ്രവിച്ചതായും വീഡിയോ പകര്‍ത്താന്‍ ശ്രമിച്ചതായും നടി പൊലിസില്‍ പരാതിപ്പെട്ടിരുന്നു അങ്കമാലിയില്‍ വച്ചായിരുന്നു സംഭവം.

പരാതിയുടെ അടിസ്ഥാനത്തില്‍ നടിയുടെ മുന്‍ ഡ്രൈവര്‍ കൊരട്ടി സ്വദേശി മാര്‍ട്ടിനെ പൊലിസ് കസ്റ്റഡിയിലെടുത്തിരുന്നു. പെരുമ്പാവൂര്‍ സ്വദേശി സുനിലാണ് തട്ടിക്കൊണ്ടുപോകാന്‍ നേതൃത്വം നല്‍കിയതെന്ന് നടി പറഞ്ഞു.

എ.ഡി.ജി.പി ബി. സന്ധ്യയുടെ മേല്‍നോട്ടത്തില്‍ ഐ.ജി ദിനേന്ദ്ര കശ്യപിന്റെ നേതൃത്വത്തിലുള്ള സംഘമാണ് കേസ് അന്വേഷിക്കുന്നത്.റൂറല്‍ എസ്.പി, ഡി.സി.പി, ആലുവ ഡി.വൈ.എസ്.പി, വനിതാ സി.ഐ എന്നിവരും സംഘത്തിലുണ്ട്.

സംഭവത്തില്‍ ഏഴു പ്രതികളുണ്ടെന്ന് പൊലിസ് അറിയിച്ചു. പ്രതികള്‍ സഞ്ചരിച്ച വാഹനവും കസ്റ്റഡിയിലെടുത്തിട്ടുണ്ട്. നടിയുടെ രഹസ്യമൊഴി മജിസ്‌ട്രേറ്റ് രേഖപ്പെടുത്തി. കളമശ്ശേരി കോടതിയിലാണ് മൊഴി രേഖപ്പെടുത്തിയത്.