തിരുവമ്പാടി: കൂടരഞ്ഞി ഗ്രാമപഞ്ചായത്തിലെ മഞ്ഞക്കടവില്‍ ക്രഷറിന് അനുമതി നല്‍കിയ പഞ്ചായത്ത് നടപടിക്കെതിരേ സി.പി.എം രംഗത്തെത്തി.
ഭരണ സമിതി യോഗത്തില്‍ ആറ് അംഗങ്ങളുടെ എതിര്‍പ്പ് അവഗണിച്ചാണ് ക്രഷറിന് പഞ്ചായത്ത് അനുമതി നല്‍കിയതെന്ന് ഇടത് അംഗങ്ങള്‍ ആരോപിക്കുന്നു. ഉരുള്‍പൊട്ടല്‍ സാധ്യത കൂടുതലുള്ള ചെങ്കുത്തായ മലയില്‍ ക്രഷര്‍ തുടങ്ങുന്നത് ജനങ്ങളുടെ സുരക്ഷയ്ക്ക് ഭീഷണിയുമാണ്. സമീപത്ത് സ്‌കൂള്‍ പ്രവര്‍ത്തിക്കുന്നതും ഇടത് അംഗങ്ങള്‍ ചൂണ്ടിക്കാട്ടുന്നു.
ക്രഷറിന് അനുമതി നല്‍കുന്നതിന് മുന്‍പ് ഉപസമിതി രൂപീകരിച്ച് അന്വേഷിക്കണമെന്ന ഇടത് അംഗങ്ങളുടെ ആവശ്യം നേരത്തെ ഭരണ സമിതി തളളിയിരുന്നു. വ്യാജമായ രേഖകള്‍ സമര്‍പ്പിച്ചാണ് ക്രഷര്‍ ഉടമകള്‍ അനുമതി തരപ്പെടുത്തിയതെന്നും ഇടത് അംഗങ്ങള്‍ ആരോപിക്കുന്നു.
ക്രഷറിന് അനുമതി നല്‍കുന്നതിനെതിരെ നാല് ഇടത് അംഗങ്ങളും ജനതാദള്‍, കേരള കോണ്‍ഗ്രസ്സ് (എം) എന്നീ അംഗങ്ങള്‍ ഭരണ സമിതി യോഗത്തില്‍ വിയോജിപ്പ് രേഖപ്പെടുത്തി.