തൊടുപുഴ: മലയോര ജനതയുടെ യാത്രാക്ലേശത്തിന് ഒരളവുവരെ പരിഹാരമായ വണ്ടിപ്പെരിയാര്‍ പുതിയ പാലം ഇന്ന് തുറന്നുകൊടുക്കും.
കൊല്ലം - തേനി ദേശീയ പാതയിലെ (എന്‍.എച്ച് 185) വണ്ടിപ്പെരിയാറില്‍ പൂര്‍ത്തീകരിച്ച പാലത്തിന്റെ ഉദ്ഘാടനം ഇന്ന് രാവിലെ 9.30 ന് സംസ്ഥാന പൊതുമരാമത്ത് വകുപ്പുമന്ത്രി ജി. സുധാകരന്‍ നിര്‍വഹിക്കും. ഇ.എസ്. ബിജിമോള്‍ എം.എല്‍.എ അധ്യക്ഷനാകും. പഴയ കെ.കെ റോഡിലെ വണ്ടിപ്പെരിയാര്‍ പാലം പുതുക്കിപ്പണിയണമെന്ന ജനങ്ങളുടെ വര്‍ഷങ്ങളായുള്ള ആവശ്യമാണ് സാക്ഷാല്‍കരിക്കപ്പെടുന്നത്.
കേന്ദ്ര സര്‍ക്കാരിന്റെ ഏറ്റവും പുതിയ പദ്ധതിയായ ഇ.പി.സി മാതൃകയിലാണ് (എന്‍ജിനിയറിങ് പ്രൊക്വയര്‍മെന്റ് കോണ്‍ട്രാക്ട്) വണ്ടിപ്പെരിയാര്‍ പാലം നിര്‍മിച്ചത്.
അനുവദിക്കപ്പെട്ടിരുന്ന രണ്ട് വര്‍ഷമെന്ന സമയപരിധിക്കുള്ളില്‍ തന്നെ കൃത്യമായി നിര്‍മാണം പൂര്‍ത്തിയാക്കി. 6.40 കോടി ചിലവിലാണ് പാലം നിര്‍മ്മാണം പൂര്‍ത്തിയാക്കിയത്. ഇ.പി.സി മോഡില്‍ കേരളത്തിന് ലഭിച്ച ആദ്യ പദ്ധതികളിലൊന്നാണ് വണ്ടിപ്പെരിയാര്‍ പാലം. വണ്ടിപ്പെരിയാറില്‍ നിലവിലുള്ള ഇടുങ്ങിയ പാലത്തിലൂടെയുള്ള വാഹന ഗതാഗതം ഏറെ അപകടങ്ങള്‍ ക്ഷണിച്ചു വരുത്തിയിരുന്നു. ലക്ഷക്കണക്കായ ശബരിമല തീര്‍ത്ഥാടകര്‍ക്ക് ഏറെ സന്തോഷം നല്‍കുന്നതാണ് പുതിയ പാലം.
100 മീറ്റര്‍ നീളവും 11 മീറ്റര്‍ വീതിയുമുള്ള പാലത്തിന് നാല് സ്പാനുകളുണ്ട്.
മൂവാറ്റുപുഴ ആസ്ഥാനമായുള്ള അക്ഷയ ബില്‍ഡേഴ്‌സാണ് പാലത്തിന്റെ കരാറുകാര്‍. സി.ഒ.എസ് കമ്പനിയാണ് കണ്‍സള്‍ട്ടന്റ്. കാഞ്ഞിരപ്പള്ളി എന്‍.എച്ച് സബ് ഡിവിഷനാണ് നിര്‍മ്മാണ പ്രവര്‍ത്തനങ്ങള്‍ക്ക് മേല്‍നോട്ടം വഹിച്ചത്.
ഉദ്ഘാടന സമ്മേളനത്തില്‍ വൈദ്യുതി മന്ത്രി എം.എം.മണി, ജില്ലയിലെ എം.എല്‍.എ മാര്‍, ത്രിതല പഞ്ചായത്ത് ജനപ്രതിനിധികള്‍, സാമൂഹ്യ രാഷ്ട്രീയ പ്രതിനിധികള്‍, ദേശീയ പാതാ - പൊതുമരാമത്ത് വിഭാഗം ഉന്നതോദ്യോഗസ്ഥര്‍ എന്നിവര്‍ പങ്കെടുക്കും.