ബദിയടുക്ക: മരപ്പൊടിയെന്ന വ്യാജേന പൂഴികടത്തുകയായിരുന്ന ടോറസ് ലോറി ബദിയഡുക്ക പൊലിസ് പിന്തുടര്‍ന്നു പിടികൂടി. ഇന്നലെ രാവിലെ എട്ടോടെ ചര്‍ളടുക്ക മീനാടിപ്പള്ളയില്‍ ബദിയടുക്ക എസ്.ഐ എ ദാമോദരന്റെ നേതൃത്വത്തിലുള്ള സംഘമാണു ലോറി പിടികൂടിയത്. ലോറിയിലുണ്ടായിരുന്ന രണ്ടുപേര്‍ പൊലിസിനെ കണ്ട് ഓടി രക്ഷപ്പെട്ടു.
ലോറിയുടെ ബോഡിനിരപ്പില്‍ പൂഴി നിറച്ചശേഷം അതിനു മുകളില്‍ മരപ്പൊടി നിറച്ച 26 ചാക്കുകള്‍ അട്ടിവച്ചു കെട്ടി ഉറപ്പിച്ച് മണല്‍ കടത്തുകയായിരുന്നു. മരപ്പൊടിയെന്ന നിലയില്‍ ഇതിനു ചെക്ക് പോസ്റ്റില്‍ നികുതി അടക്കുകയും ചെയ്തിരുന്നു. രഹസ്യ വിവരത്തെ തുടര്‍ന്നാണ് പൊലിസ് പിന്തുടര്‍ന്നു ലോറി പിടികൂടിയത്.
ദിവസങ്ങള്‍ക്ക് മുമ്പ് ഹോളോ ബ്രിക്‌സ് എന്ന വ്യാജേന മുകളില്‍ ഹോളോ ബ്രിക്‌സ് നിരത്തി വച്ച് അതിനടിയില്‍ മണല്‍ കടത്തുകയായിരുന്ന നാഷണല്‍ പെര്‍മിറ്റ് ലോറി പിടികൂടി കര്‍ണാടക സ്വദേശികളായ രണ്ടു പേരെ അറസ്റ്റുചെയ്ത് മണല്‍ മോഷണത്തിന് കേസെടുത്തിരുന്നു.
അതിനും ചെക്ക് പോസ്റ്റില്‍ ഹോളോ ബ്രിക്‌സെന്ന പേരില്‍ നികുതി അടച്ചിരുന്നു.