മനാമ: കേരള മുഖ്യമന്ത്രി പിണറായി വിജയന്റെ ത്രിദിന ബഹ്‌റൈന്‍ സന്ദര്‍ശനം പ്രഹസനമായിരുന്നുവെന്നും അദ്ദേഹത്തിന്റെ സന്ദര്‍ശനം കൊണ്ട് നേട്ടമുണ്ടായത് വന്‍കിട ബിസിനസ്സുകാര്‍ക്ക് മാത്രമാണെന്നും ബഹ്‌റൈന്‍ ഐ.വൈ.സി.സി പത്രക്കുറിപ്പില്‍ അറിയിച്ചു. നേരത്തെ ഉമ്മന്‍ചാണ്ടി കേരള മുഖ്യമന്ത്രി ആയ സമയത്ത് ബഹ്‌റൈനില്‍ വന്നതും പിണറായി വന്നതും തമ്മില്‍ വലിയ അന്തരമുണ്ട് എന്നതാണു മൂന്ന് ദിവസത്തെ പിണറായിയുടെ സന്ദര്‍ശനം സൂചിപ്പിക്കുന്നത്.

രണ്ടു ദിവസം ബഹ്‌റൈനില്‍ ഉണ്ടായിരുന്ന ഉമ്മന്‍ചാണ്ടി 30ല്‍പരം പരിപാടികള്‍ക്കാണു പങ്കെടുത്തത്. കൂടാതെ ബഹ്‌റൈന്‍ പ്രവാസികളുടെ ആശാ കേന്ദ്രങ്ങളായ വിവിധ സ്ഥാപനങ്ങളും ഇന്ത്യന്‍ സ്‌കൂള്‍, വിവിധ സംഘടനാ ഓഫിസുകള്‍, ആരാധനാലയങ്ങളടക്കം പത്ര സ്ഥാപനങ്ങളും വരെ അദ്ദേഹം സന്ദര്‍ശിച്ചിരുന്നു. എന്നാല്‍, പിണറായി വിജയന്‍ ആകെ നാലു പരിപാടികള്‍ക്കാണു പങ്കെടുത്തത്. മാത്രവുമല്ല കുറച്ച് പ്രഖ്യാപനങ്ങള്‍ നടത്തുകയും മാത്രമാണ് ഉണ്ടായത്. ബഹ്‌റൈന്‍ ഭരണാധികാരികളില്‍ നിന്ന് യാതൊരു ഉറപ്പും നേടാന്‍ അദ്ദേഹത്തെ കൊണ്ട് കഴിഞ്ഞതുമി എന്നും പത്രക്കുറിപ്പില്‍ പറയുന്നു.

സി.പി.എം പ്രവര്‍ത്തകരായ പ്രവാസികള്‍ക്ക് പോലും കേരളീയ സമാജത്തിലെ പൗരസ്വീകരണത്തില്‍ ദൂരെ നിന്ന് അദ്ദേഹത്തെ ഒരു നോക്ക് കാണാനേ കഴിഞ്ഞുള്ളൂ. തോഴിലാളികളുടെ തൊഴില്‍ പ്രശ്‌നങ്ങള്‍ മനസ്സിലാക്കാനോ അവരുമായി ആശയവിനിമയം നടത്താനോ പോലും അദ്ദേഹത്തിന് കഴിഞ്ഞതുമില്ല. പ്രധാനമന്ത്രി നരേന്ദ്രമോദി വിദേശത്ത് പോകുമ്പോള്‍ അദാനിയേയും അംബാനിമാരേയും കൊണ്ട് നടക്കുന്നത് പോലെ പിണറായിയും അതേ പാത പിന്തുടരുകയായിരുന്നുവെന്ന് വേണം കരുതാന്‍. അതുപോലെ മാധ്യമ പ്രവര്‍ത്തകരെ കാണാനും മുഖ്യമന്ത്രി തയ്യാറാവാത്തത് പ്രതിഷേധാര്‍ഹമാണ്. വി.വി.ഐ.പികള്‍ നടത്തുന്ന പരിപാടികളില്‍ മാത്രം പങ്കെടുത്തു കൊണ്ട് അദ്ദേഹം നടത്തിയ പ്രഖ്യാപനങ്ങള്‍ യാഥാര്‍ഥ്യമാകുമോ അതല്ല പാഴ്‌വാക്കാകുമോ എന്നത് കണ്ടറിയേണ്ട കാര്യവുമാണെന്നും പത്രക്കുറിപ്പില്‍ പറയുന്നു.