ജിദ്ദ: സഊദിയിലെ വിവിധ പ്രവിശ്യയില്‍ വീശിയടിച്ച പൊടിക്കാറ്റു മൂലമുള്ള ആരോഗ്യ പ്രശ്‌നങ്ങളാല്‍ 1122 പേര്‍ ആശുപത്രികളില്‍ ചികിത്സ തേടിയതായി റിയാദ് ആരോഗ്യ വകുപ്പ് അറിയിച്ചു.

ആസ്ത്മ അടക്കമുള്ള ആരോഗ്യ പ്രശ്‌നങ്ങളുമായി സമീപിക്കുന്നവരെ സ്വീകരിക്കുന്നതിന് റിയാദിലെ ആശുപത്രികള്‍ ഒരുക്കങ്ങള്‍ പൂര്‍ത്തിയാക്കിയിരുന്നു.

പൊടിക്കാറ്റു മൂലമുള്ള ആരോഗ്യ പ്രശ്‌നങ്ങള്‍ക്ക് ചികിത്സ നല്‍കുന്നതിന് എല്ലാ പ്രവിശ്യകളിലെയും ആശുപത്രികള്‍ സുസജ്ജത ഉയര്‍ത്തിയതായി ആരോഗ്യ മന്ത്രാലയം അറിയിച്ചു. വാതിലുകളും ജനലുകളും നന്നായി അടച്ചിടണമെന്നും പുറത്തിറങ്ങുന്നവര്‍ മാസ്‌കുകള്‍ ധരിക്കണമെന്നും മാസ്‌കുകള്‍ ഇടക്കിടെ മാറ്റണമെന്നും ആരോഗ്യ മന്ത്രാലയം നിര്‍ദേശിച്ചു.

പൊടിക്കാറ്റു മൂലമുള്ള അസുഖങ്ങളുമായി രണ്ടു ദിവസത്തിനിടെ അല്‍ഹസയിലെ ആശുപത്രികളില്‍ 400 ലേറെ പേര്‍ എത്തിയതായി അല്‍ഹസ ആരോഗ്യ വകുപ്പ് വക്താവ് അബ്ദുറഹ്മാന്‍ അല്‍ സദ്‌റാനി പറഞ്ഞു.

പൊടിക്കാറ്റിനുള്ള സാധ്യത കണക്കിലെടുത്ത് റിയാദില്‍ ഇന്നലെ വിദ്യാഭ്യാസ സ്ഥാപനങ്ങള്‍ക്ക് അവധി നല്‍കിയിരുന്നു.