മുംബൈ: പഞ്ചാബ് നാഷനല്‍ ബാങ്കിനു പിന്നാലെ മൂന്ന് ബാങ്കുകള്‍കൂടി തട്ടിപ്പിനിരയായതായി വിവരം. രണ്ട് ബാങ്കുകള്‍ പൊതുമേഖലാ ബാങ്കുകളാണെങ്കില്‍ ഒന്ന് സ്വകാര്യ ബാങ്കാണ്. 11,500ഓളം കോടി രൂപയുടെ തട്ടിപ്പാണ് പഞ്ചാബ് നാഷനല്‍ ബാങ്കില്‍ നടന്നതെന്നാണ് പ്രാഥമികാന്വേഷണത്തില്‍ കണ്ടെത്തിയത്.
ഇതിനുപിന്നാലെയാണ് യൂനിയന്‍ ബാങ്ക് ഓഫ് ഇന്ത്യ, അലഹബാദ് ബാങ്ക്, സ്വകാര്യ ബാങ്കായ ആക്‌സിസ് ബാങ്ക് എന്നിവയിലേക്ക് കൂടി തട്ടിപ്പ് വ്യാപിച്ചതായി കണ്ടെത്തിയത്. ഈ ബാങ്കുകളുടെ വിദേശ ശാഖകളാണ് തട്ടിപ്പില്‍ അകപ്പെട്ടത്.
പി.എന്‍.ബി മറ്റ് ബാങ്കുകള്‍ക്ക് നല്‍കിയ ലെറ്റര്‍ ഓഫ് അണ്ടര്‍ സ്റ്റാന്‍ഡിങ് അനുസരിച്ച് നീരവ് മോദിക്ക് വായ്പ അനുവദിച്ചതാണ് ഈ മൂന്ന് ബാങ്കുകളെയും തട്ടിപ്പിലേക്ക് അടുപ്പിച്ചത്.
വിദേശ ബാങ്കുകള്‍ ഇടപാടുകാര്‍ക്ക് ഇതനുസരിച്ച് വായ്പയും അനുവദിക്കാറുണ്ട്.
നീരവ് മോദിയുടെ ജുവല്ലറി കമ്പനിയെ മുന്‍നിര്‍ത്തിയുള്ള ബന്ധത്തിന്റെ അടിസ്ഥാനത്തിലാണ് ഈ മൂന്ന് ബാങ്കുകളുടെയും ശാഖകള്‍ വായ്പ അനുവദിച്ചത്.
നീരവ് മോദിയുടെ ഹോങ്കോങ്, ദുബൈ, ന്യൂയോര്‍ക്ക് ജുവല്ലറി ശാഖകളില്‍ 2010 മുതല്‍ പി.എന്‍.ബി ലെറ്റര്‍ ഓഫ് അണ്ടര്‍ സ്റ്റാന്‍ഡിങ് നല്‍കിയിട്ടുണ്ടെന്നാണ് വിവരം.