അമരാവതി: പൊള്ളയായ വാഗ്ദാനങ്ങളുമായി പ്രധാനമന്ത്രി നരേന്ദ്ര മോദി ജനങ്ങളെ കബളിപ്പിക്കുകയാണെന്ന ആരോപണം നിലനില്‍ക്കെ, കേന്ദ്ര സര്‍ക്കാരിനെ കടുത്ത പ്രതിസന്ധിയിലാക്കി തെലുങ്കുദേശം പാര്‍ട്ടി. ധനകാര്യ മന്ത്രി അരുണ്‍ ജെയ്റ്റ്‌ലി സംസ്ഥാനത്തിന് ഉറപ്പുനല്‍കിയ 19 കാര്യങ്ങള്‍ നിറവേറ്റാന്‍ തയാറായിട്ടില്ലെങ്കില്‍ എന്‍.ഡി.എ മുന്നണി വിടുമെന്നാണ് സര്‍ക്കാരിലെ പ്രമുഖ കക്ഷികൂടിയായ ടി.ഡി.പി മുന്നറിയിപ്പ് നല്‍കുന്നത്. ഇന്നലെ പാര്‍ട്ടി ഔദ്യോഗികമായിട്ടാണ് ഇക്കാര്യം അറിയിച്ചത്. മാര്‍ച്ച് അഞ്ചിനകം ഇക്കാര്യത്തില്‍ തീരുമാനമായിട്ടില്ലെങ്കില്‍ കേന്ദ്ര സര്‍ക്കാരിലെ ടി.ഡി.പി മന്ത്രിമാരെ പിന്‍വലിക്കുമെന്ന് ആദിനാരായണ റെഡ്ഡി എം.പി മുന്നറിയിപ്പ് നല്‍കി.
ആന്ധ്രപ്രദേശിന് പ്രത്യേക പദവി നല്‍കി സാമ്പത്തിക സഹായം ഉള്‍പ്പെടെയുള്ളവ അനുവദിക്കുമെന്ന് നേരത്തെ ധനകാര്യമന്ത്രി അറിയിച്ചിരുന്നു. അഞ്ചുവര്‍ഷത്തേക്കുള്ള സാമ്പത്തിക സഹായത്തിലൂടെ സംസ്ഥാനത്തെ ഉയര്‍ത്തുമെന്നായിരുന്നു കേന്ദ്രം വാഗ്ദാനം ചെയ്തിരുന്നത്. രാജ്യസഭയില്‍ ഇക്കാര്യം ധനകാര്യ മന്ത്രി അറിയിക്കുകയും ചെയ്തിരുന്നു. എന്നാല്‍ ബജറ്റില്‍ ഇതുസംബന്ധിച്ച് ഒരു നടപടിയും ഉണ്ടാകാത്തതിനെ തുടര്‍ന്ന് ടി.ഡി.പി ശക്തമായ പ്രതിഷേധമാണ് ഉയര്‍ത്തിയിരുന്നത്. ഇതോടെ സാമ്പത്തിക പാക്കേജ് കേന്ദ്രം പ്രഖ്യാപിച്ചെങ്കിലും ഇത് പരിമിതമാണെന്ന് ആരോപിച്ചാണ് ഇപ്പോള്‍ ടി.ഡി.പി വിയോജിപ്പ് ശക്തമാക്കിയത്.