ഈസ്റ്റ് ലണ്ടന്‍: ദക്ഷിണാഫ്രിക്കന്‍ വനിതാ ടീമിനെതിരായ രണ്ടാം ടി20 പോരാട്ടത്തിലും ഇന്ത്യന്‍ വനിതാ ടീമിന് വിജയം. ഒന്‍പത് വിക്കറ്റിന്റെ സുരക്ഷിത വിജയമാണ് ഇന്ത്യ സ്വന്തമാക്കിയത്. ആദ്യം ബാറ്റ് ചെയ്ത ദക്ഷിണാഫ്രിക്ക നിശ്ചിത 20 ഓവറില്‍ ഏഴ് വിക്കറ്റ് നഷ്ടത്തില്‍ 142 റണ്‍സെടുത്തപ്പോള്‍ ഇന്ത്യ ഒറ്റ വിക്കറ്റ് മാത്രം നഷ്ടത്തില്‍ 19.1 ഓവറില്‍ 144 റണ്‍സെടുത്താണ് വിജയിച്ചത്.
വെറ്ററന്‍ ഓപണര്‍ മിതാലി രാജ് (പുറത്താകാതെ 76), സഹ ഓപണര്‍ സ്മൃതി മന്ധന (57) എന്നിവരുടെ അര്‍ധ സെഞ്ച്വറികളുടെ മികവിലാണ് ഇന്ത്യയുടെ അനായാസ വിജയം. കളി വിജയിക്കുമ്പോള്‍ മിതാലിക്കൊപ്പം ക്യാപ്റ്റന്‍ ഹര്‍മന്‍പ്രീത് കൗര്‍ ഏഴ് റണ്‍സുമായി പുറത്താകാതെ ക്രീസിലുണ്ടായിരുന്നു.
നേരത്തെ ടോസ് നേടി ഇന്ത്യ ഫീല്‍ഡിങ് തിരഞ്ഞെടുക്കുകയായിരുന്നു. രണ്ട് വീതം വിക്കറ്റുകളെടുത്ത് അനുജ പാട്ടീല്‍, പൂനം യാദവ് എന്നിവര്‍ ഇന്ത്യക്കായി തിളങ്ങി. 33 റണ്‍സെടുത്ത സുനെ ലൂസാണ് ദക്ഷിണാഫ്രിക്കന്‍ നിരയിലെ ടോപ് സ്‌കോറര്‍. അഞ്ച് മത്സരങ്ങളടങ്ങിയ പരമ്പരയില്‍ ഇന്ത്യ 2-0ത്തിന് മുന്നില്‍.