ഹിദായ നഗര്‍(ചെമ്മാട്): മതസാമൂഹിക മുന്നേറ്റവും ബഹുസ്വരതതയും ഉയര്‍ത്തിപിടിച്ച് സമുദായോന്നമനത്തിനു കര്‍മരംഗത്തിറങ്ങണമെന്ന് എസ്.കെ.എസ്.എസ്.എഫ് ദേശീയ സംഗമം. മതകീയ വിദ്യാഭ്യാസമുന്നേറ്റത്തിലൂടെ രാജ്യത്ത് ഇതു സാധ്യമാണ്.
ഭരണഘടന അടിസ്ഥാനമാക്കി മതകീയ ശാക്തീകരണ പ്രവര്‍ത്തനങ്ങള്‍ നടപ്പാക്കുകയും, അതോടൊപ്പം ഇതര മത സമുദായ മൂല്യങ്ങള്‍ മാനിക്കുകയുമാണ് പ്രബോധന രംഗത്ത് തുടരുന്ന രീതിയെന്നും എസ്.കെ.എസ്.എസ്.എഫ് ലീഡേഴ്‌സ് പാര്‍ലമെന്റ് 'വിവിസേ 18'നു തുടക്കം കുറിച്ച് നടന്ന ദേശീയ സംഗമം അഭിപ്രായപ്പെട്ടു. ചെമ്മാട് ദാറുല്‍ഹുദാ ഇസ്‌ലാമിക് യൂനിവേഴ്‌സിറ്റിയില്‍ ഇന്നലെ രാവിലെ മുതലാണ് ത്രിദിന ലീഡേഴ്‌സ് പാര്‍ലിമെന്റ് തുടങ്ങിയത്. രാവിലെ പത്തിനു എസ്.വൈ.എസ് സംസ്ഥാന ജനറല്‍സെക്രട്ടറിയും കോഴിക്കോട് ഖാസിയുമായ സയ്യിദ് മുഹമ്മദ്‌കോയ തങ്ങള്‍ ജമലുല്ലൈലി പതാക ഉയര്‍ത്തി.
തുടര്‍ന്നു ദേശീയ സംഗമം എസ്.കെ.എസ്.എസ്.എഫ് സംസ്ഥാന പ്രസിഡന്റ് പാണക്കാട് സയ്യിദ് ഹമീദലി ശിഹാബ് തങ്ങള്‍ ഉദ്ഘാടനം ചെയ്തു. വിവിധ സംസ്ഥാനങ്ങളിലെ എസ്.കെ.എസ്.എസ്.എഫ് ചാപ്റ്ററുകളില്‍ നിന്നുള്ള തെരഞ്ഞെടുക്കപ്പെട്ട പ്രതിനിധികളാണ് സംഗമത്തില്‍ പങ്കെടുത്തത്. അസ്‌ലം ഫൈസി ബംഗളൂരു (സമസ്ത), നൗഫല്‍ ഹുദവി മംഗളൂരു (മോഡല്‍ യൂനിറ്റ്) എന്നിവര്‍ വിഷയമവതരിപ്പിച്ചു.
വൈകീട്ട് നടന്ന ഗ്രൂപ്പ് ഡിസ്‌കഷന് ഡോ.സുബൈര്‍ ഹുദവി നേതൃത്വം നല്‍കി. മൗലാനാ മുസ്തഖീം ഫൈസി ബഗല്‍പ്പൂര്‍, മൗലാനാ സുഹൈല്‍ അംജദി ഉത്തര്‍ പ്രദേശ്. സി യൂസുഫ് ഫൈസി, കെ.എം സൈതലവി ഹാജി,യു ശാഫിഹാജി, ഹംസഹാജി മൂന്നിയൂര്‍, കെ.പി ശംസുദ്ദീന്‍ ഹാജി,വി.ടി റഫീഖ് ഹുദവി, സിദ്ദീഖ് ഹാജി ചെറുമുക്ക്, അബ്ദുല്ല ഹാജി ഓമച്ചപ്പുഴ, ചെറീത് ഹാജി പങ്കെടുത്തു. ഡോ. ജാബിര്‍ ഹുദവി സ്വാഗതവും ഡോ. മജീദ് കൊടക്കാട് നന്ദിയും പറഞ്ഞു.
രണ്ടാം ദിനമായ ഇന്ന് 'സ്‌റ്റേറ്റ് ലീഡര്‍ഷിപ്പ് പാര്‍ലമെന്റ്' നടക്കും. പുതിയ അംഗത്വകാംപയിന്റെ ഭാഗമായി നിലവില്‍വന്ന യൂനിറ്റു തലം മുതലുള്ള പ്രധാന ഭാരവാഹികള്‍ സംഗമിക്കും.
ഓണ്‍ലൈന് മുഖേന രജിസറ്റര്‍ ചെയ്ത അയ്യായിരത്തോളം പ്രതിനിതികളാണ് ക്യാംപിനെത്തുന്നത്. രാവിലെ ഒന്‍പതിനു ആരംഭിക്കുന്ന പരിപാടി സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ ഉദ്ഘാടനം ചെയ്യും.
സിയാറത്തിന് സമസ്ത മുശാവറ അംഗം മരക്കാര്‍ ഫൈസി നേതൃത്വം നല്‍കും. സയ്യിദ് ഫഖ്‌റുദ്ധീന് തങ്ങള്‍ ബഹ്‌റൈന്‍, അബ്ദുല്‍ ഹമീദ് ഫൈസി അമ്പലക്കടവ്, ഡോ. അഷ്‌റഫ് കടക്കല്‍, സത്താര്‍ പന്തല്ലൂര്‍, എസ്.വി മുഹമ്മദലി പ്രബന്ധങ്ങള്‍ അവതരിപ്പിക്കും.
വൈകീട്ട് നാലു മണിക്ക് സമാപന സെഷന്‍ പാണക്കാട് സയ്യിദ് സ്വാദിഖലി ശിഹാബ് തങ്ങള്‍ ഉദ്ഘാടനം ചെയ്യും. അബ്ദുസ്സമദ് പൂക്കോട്ടൂര്‍, യൂ. ശാഫി ഹാജി സംസാരിക്കും. രാത്രി കൗണ്‍സിലേഴ്‌സ് പാര്‍ലമെന്റ് സമസ്ത വിദ്യാഭ്യാസ ബോര്‍ഡ് മാനേജര്‍ കെ മോയിന്‍ കുട്ടി മാസ്റ്റര്‍ ഉദ്ഘാടനം ചെയ്യും.
നാളെ രാവിലെ പുതിയ കൗണ്‍സില്‍ മീറ്റും പരിശീലന പരിപാടിയും നടക്കും. പാണക്കാട് സയ്യിദ് അബ്ബാസലി ശിഹാബ് തങ്ങള്‍ ഉദ്ഘാടനം ചെയ്യും.റഹീം ചുഴലി, അഹ്മദ് വാഫി എന്നിവര്‍ പരിശീലനത്തിനു നേതൃത്വം നല്‍കും.
ഉച്ചക്ക് ശേഷം അനുസ്മരണ സെഷനില്‍ എം.എ പരീത്, എം.പി കടുങ്ങല്ലൂര്‍, മുസ്തഫ മുണ്ടുപാറ, നാട്ടിക മുഹമ്മദലി, ഒ.കെ.എം കുട്ടി ഉമരി, സി.എച്ച് ത്വയ്യിബ് ഫൈസി, അബ്ദുറസാഖ് ബുസ്താനി, സലീം എടക്കര പങ്കെടുക്കും.