അഡിസ് അബാബ: ആഫ്രിക്കന്‍ രാജ്യമായ എത്യോപ്യയില്‍ അടിയന്തരാവസ്ഥ പ്രഖ്യാപിച്ചു. പ്രധാനമന്ത്രി ഹൈലെ മറിയം ദെസാലെഗിന്‍ രാജിവച്ചൊഴിഞ്ഞതിനു പിറകെയാണ് ദേശീയ അടിയന്തരാവസ്ഥ പ്രഖ്യാപിച്ച് ഉത്തരവായത്.
രാജ്യത്ത് ശക്തിപ്പെട്ടുകൊണ്ടിരിക്കുന്ന സര്‍ക്കാര്‍ വിരുദ്ധപ്രക്ഷോഭങ്ങളെ നേരിടാനായാണ് സര്‍ക്കാര്‍ അടിയന്തരാവസ്ഥ പ്രഖ്യാപിച്ചിരിക്കുന്നത്. സര്‍ക്കാര്‍ ചാനലാണു വാര്‍ത്ത പുറത്തുവിട്ടത്. മൂന്നു വര്‍ഷത്തോളമായി രാജ്യത്ത് തുടരുന്ന പ്രതിപക്ഷ പ്രക്ഷോഭം രൂക്ഷമായതിനെ തുടര്‍ന്ന് ഭരണസംവിധാനങ്ങളും മറ്റും താറുമാറായ സ്ഥിതിയാണ്. കഴിഞ്ഞ വര്‍ഷവും അടിയന്തരാവസ്ഥ പ്രഖ്യാപിച്ചിരുന്നെങ്കിലും പ്രക്ഷോഭത്തെ തളര്‍ത്താന്‍ ഇതിനായിരുന്നില്ല. പത്ത് മാസത്തോളമാണ് ഈ അടിയന്തരാവസ്ഥ നീണ്ടുനിന്നത്. നൂറുകണക്കിനു പേര്‍ മൂന്നു വര്‍ഷത്തിനിടെയുണ്ടായ പ്രക്ഷോഭങ്ങള്‍ക്കിടെ മരിച്ചിരുന്നു. പ്രക്ഷോഭത്തെ തണുപ്പിക്കാനുള്ള നീക്കത്തിന്റെ ഭാഗമായായിരുന്നു പ്രധാനമന്ത്രിയുടെ രാജി.