കൊച്ചി: ഫോട്ടോ ജേര്‍ണലിസ്റ്റ് ഫോറത്തിന്റെ വാര്‍ത്താ ചിത്രപ്രദര്‍ശനം 'പോര്‍ട്ട് ഫോളിയോ-2018' ചിത്രപ്രദര്‍ശനത്തിനോടനുബന്ധിച്ച് നടത്തിയ സി.കെ ജയകൃഷ്ണന്‍ ന്യൂസ് ഫോട്ടോഗ്രാഫിയില്‍ സുപ്രഭാതം കോഴിക്കോട് യൂണിറ്റിലെ ഫോട്ടോഗ്രാഫര്‍ നിധീഷ് കൃഷ്ണന്‍ പ്രത്യേക പരാമര്‍ശം നേടി.

മലയാള മനോരമ കണ്ണൂര്‍ യൂണിറ്റിലെ ഫോട്ടോഗ്രാഫര്‍ എം.ടി വിധൂരാജാണ് അവാര്‍ഡിന് അര്‍ഹനായത്. 10,000 രൂപയും പ്രശസ്തിപത്രവും ശില്‍പ്പവും അടങ്ങുന്നതാണ് അവാര്‍ഡ്. ഇന്ത്യന്‍ എക്‌സ്പ്രസ് കൊച്ചി യൂണിറ്റിലെ സീനിയര്‍ ഫോട്ടോഗ്രാഫര്‍ മില്‍ട്ടണ്‍ ആന്റണിയും പ്രത്യേക പരാമര്‍ശനത്തിനര്‍ഹനയാട്ടുണ്ട്. എന്‍.എസ് മാധവന്‍, ഡോ. സെബാസ്റ്റിയന്‍പോള്‍, രാജന്‍ പോള്‍ എന്നിവരടങ്ങിയ ജൂറിയാണ് അവര്‍ഡ് നിര്‍ണയിച്ചത്. ഫെബ്രുവരി 22ന് വൈകീട്ട് കൊച്ചിയില്‍ നടക്കുന്ന ചടങ്ങില്‍ പുരസ്‌കാരം സമ്മാനിക്കും.

പോര്‍ട്ട് ഫോളിയോ-2018 ചിത്രപ്രദര്‍ശനം ഫെബ്രുവരി 22 വ്യാഴാഴ്ച എറണാകുളം ദര്‍ബാര്‍ ഹാള്‍ ആര്‍ട്ട് ഗ്യാലറിയില്‍ ആരംഭിക്കും. പ്രദര്‍ശനം 25ന് ഞായറാഴ്ച സമാപിക്കുകയും ചെയ്യും. നാലു ദിവസം നീണ്ടുനില്‍ക്കുന്ന പ്രദര്‍ശനത്തില്‍ കൊച്ചിയിലെ വിവിധ പത്രങ്ങളില്‍ നിന്നുള്ള 40ഓളം ന്യൂസ് ഫോട്ടോഗ്രാഫര്‍മാരുടെ 80ല്‍പ്പരം ചിത്രങ്ങളാണ് പ്രദര്‍ശിപ്പിക്കുക.