ലുധിയാന: ഐ ലീഗില്‍ അട്ടിമറി വിജയങ്ങളുമായി ഗോകുലം കേരളാ എഫ്.സി കുതിപ്പ് തുടരുന്നു. പോയിന്റ് പട്ടികയിലെ മുന്‍നിര ക്ലബുകളെ അടിച്ചമര്‍ത്തിയാണ് ഗോകുലത്തിന്റെ മുന്നേറ്റം.
കഴിഞ്ഞ രണ്ടു മത്സരങ്ങളില്‍ കൊല്‍ക്കത്തന്‍ കരുത്തന്‍മാരായ ഈസ്റ്റ് ബംഗാളിനെയും മോഹന്‍ ബഗാനെയും പരാജയപ്പെടുത്തിയ കേരളം ഇത്തവണ മിനെര്‍വ പഞ്ചാബിനെയാണ് ചുരുട്ടിക്കെട്ടിയത്. എതിരില്ലാത്ത ഒരു ഗോളിനാണ് ഗോകുലത്തിന്റെ വിജയം.
76ാം മിനുട്ടില്‍ മനോഹരമായ ബൈസിക്കിള്‍ കിക്കിലൂടെ ഹെന്റി കിസിക്കയാണ് ഗോകുലത്തിന്റെ വിജയ ഗോള്‍ നേടിയത്. ജയത്തോടെ ഗോകുലം പോയിന്റ് പട്ടികയില്‍ ആറാം സ്ഥാനത്തേക്ക് കയറി. തുടക്കത്തില്‍ തുടര്‍ച്ചയായി തോല്‍വികള്‍ ഏറ്റുവാങ്ങിയ ഗോകുലം വിജയത്തിന്റെ പാതയിലാണ്.