തലശ്ശേരി: ചരിത്രകാരന്‍ എം.പി കുമാരന്‍ മാസ്റ്ററുടെ പേരില്‍ ധര്‍മടം സര്‍വിസ് സഹകരണ ബാങ്ക് ഏര്‍പ്പെടുത്തിയ സാഹിത്യ പുരസ്‌കാരത്തിന് നിരൂപകനും ജീവചരിത്രകൃതികളുടെ രചയിതാവുമായ പ്രൊഫ. എം.കെ സാനു അര്‍ഹനായതായി പാലയാട് സാഹിത്യ പുരസ്‌കാര സമിതി അംഗങ്ങള്‍ വാര്‍ത്താസമ്മേളനത്തില്‍ അറിയിച്ചു. കേരള സാഹിത്യ അക്കാദമി അധ്യക്ഷന്‍ വൈശാഖന്‍, പ്രൊഫ. വി.എന്‍ മുരളി, ഡോ. വത്സന്‍ വാതുശ്ശേരി എന്നിവരടങ്ങിയ വിധി നിര്‍ണയ സമിതിയാണ് അവാര്‍ഡ് ജേതാവിനെ തെരഞ്ഞെടുത്തത്. 25,000 രൂപയും ശില്‍പവും പ്രശസ്തി പത്രവും അടങ്ങുന്നതാണ് പുരസ്‌കാരം.