ശാസ്താംകോട്ട(കൊല്ലം): ഉത്സവപ്പറമ്പില്‍ ഭാര്യയെ അയല്‍വാസിയായ കാമുകനൊപ്പം കണ്ടത് വീട്ടിലെത്തിയപ്പോള്‍ ചോദ്യംചെയ്ത യുവാവ് കാമുകന്റെ കുത്തേറ്റ് മരിച്ചു.
സംഭവത്തില്‍ യുവതിയും കാമുകനും പിടിയിലായി. കുത്തേറ്റ കുന്നത്തൂര്‍ മാനാമ്പുഴ ഏഴാംമൈല്‍ പെരുവിഞ്ച ശിവഗിരി കോളനിയില്‍ മഹാദേവഭവനില്‍ മഹേഷ്(39) ആണ് തിരുവനന്തപുരം മെഡിക്കല്‍ കോളജ് ആശുപത്രിയില്‍ ചികിത്സയിലിരിക്കെ ഇന്നലെ രാവിലെ മരിച്ചത്. ഭാര്യ രജനി (35), കാമുകന്‍ പോരുവഴി അമ്പലത്തുംഭാഗം കോട്ടവിള കിഴക്കതില്‍ സുനില്‍ (36) എന്നിവരാണ് പൊലിസ് കസ്റ്റഡിയിലുള്ളത്.
കഴിഞ്ഞ ദിവസം സന്ധ്യയ്ക്ക് ഉടയാന്‍കാവ് ക്ഷേത്രത്തിലെ ഉത്സവത്തിന് കാമുകനൊപ്പം ഭാര്യയെത്തിയത് മഹേഷ് കാണാനിടയായി. വീട്ടിലെത്തിയശേഷം ഇതു ചോദ്യചെയ്തതിനെ തുടര്‍ന്നുണ്ടായ തര്‍ക്കത്തില്‍ ഭാര്യ കാമുകനെ വിളിച്ചുവരുത്തുകയായിരുന്നു. കത്തിയുമായി എത്തിയ കാമുകന്‍ മഹേഷിനെ കുത്തിയ ശേഷം കടന്നുകളഞ്ഞു. സ്ഥിതി ഗുരുതരമായതിനാല്‍ ആദ്യം താലൂക്ക് ആശുപത്രിയിലും തുടര്‍ന്ന് മെഡിക്കല്‍കോളജ് ആശുപത്രിയിലും പ്രവേശിപ്പിക്കുകയായിരുന്നു. കൂലിപ്പണിക്കാരനായ മഹേഷിനും രജനിക്കും രണ്ടു കുട്ടികളുണ്ട്.