തിരുവനന്തപുരം: സംസ്ഥാനത്തെ സാമ്പത്തിക പ്രതിസന്ധി നീങ്ങിയില്ല. നികുതി വരുമാനത്തിലുള്ള കുറവാണ് കാരണം. പ്രതിസന്ധി നീങ്ങണമെങ്കില്‍ ഒരു മാസം 2,000 കോടി രൂപയെങ്കിലും നികുതി വരുമാനമുണ്ടാകണം.
എന്നാല്‍ ഇപ്പോള്‍ മാസത്തില്‍ 1,200 അല്ലെങ്കില്‍ 1,300 കോടിയാണ് നികുതി വരുമാനമെന്ന് ധനമന്ത്രി തോമസ് ഐസക് പറഞ്ഞു.
ഈ വരുമാനക്കുറവിന്റെ പ്രയാസങ്ങളുണ്ട്. എന്നാല്‍ കഴിഞ്ഞ ഒക്ടോബര്‍, നവംബര്‍, ഡിസംബര്‍ മാസങ്ങളിലുണ്ടായ വലിയ പ്രതിസന്ധി ഇനിയുണ്ടാവില്ല.
മാര്‍ച്ച് മാസം വലിയ പ്രശ്‌നങ്ങളുണ്ടാവാതെ കടന്നുപോകുമെന്നാണ് പ്രതീക്ഷ. സ്‌പെഷല്‍ ട്രഷറി അക്കൗണ്ടില്‍ മാറ്റിവച്ചിരുന്ന 13,000 കോടി അനധികൃത വായ്പയായി കേന്ദ്രം വിലയിരുത്തിയതിനാല്‍ വായ്പയെടുക്കാന്‍ നേരിട്ട തടസവും പ്രയാസം സൃഷ്ടിച്ചു. ഇതില്‍ നിന്ന് 6,000 കോടി ട്രഷറിയിലേക്കു മാറ്റിയതോടെ വായ്പയ്ക്കുള്ള തടസം ഇല്ലാതായി.
തദ്ദേശസ്വംഭരണ സ്ഥാപനങ്ങള്‍ക്ക് ഈ സാമ്പത്തിക വര്‍ഷം ചെലവഴിക്കാനാവാതെ വന്ന തുക അടുത്ത വര്‍ഷം ചെലവഴിക്കാന്‍ അനുമതി നല്‍കും. 2018- 19 സാമ്പത്തിക വര്‍ഷത്തിനിടയില്‍ ട്രഷറി ഇടപാടുകളില്‍ സമഗ്രമായ മാറ്റം വരും. മെയ് കഴിഞ്ഞാല്‍ ഇടപാടുകള്‍ പരിപൂര്‍ണമായി ഓണ്‍ലൈനാകും.
പഴയ ബില്ലുകള്‍ അപ്രത്യക്ഷമാകും. ഏപ്രില്‍ മാസത്തോടെ ക്രെഡിറ്റ്, ഡെബിറ്റ് കാര്‍ഡുകള്‍ ട്രഷറി അക്കൗണ്ടില്‍ ഉപയോഗിക്കാവുന്ന അവസ്ഥ വരും.
മാര്‍ച്ച് മുതല്‍ സെക്രട്ടേറിയറ്റ് ജീവനക്കാരുടെ ശമ്പളം ട്രഷറി സേവിങ്‌സ് ബാങ്ക് അക്കൗണ്ടില്‍ ഇടുകയാണ് ചെയ്യുക. അവര്‍ക്ക് അക്കൗണ്ടില്‍ നിന്ന് ആവശ്യത്തിനു പണമെടുക്കാം. പിന്നീട് എല്ലാ സര്‍ക്കാര്‍ ജീവനക്കാരുടെയും ശമ്പളം ഇങ്ങനെ ട്രഷറി സേവിങ്‌സ് ബാങ്ക് അക്കൗണ്ടില്‍ ഇടുന്ന സംവിധാനമുണ്ടാക്കും.
ഈ അക്കൗണ്ടില്‍ അവര്‍ക്ക് പലിശ നല്‍കും. അങ്ങനെ വരുന്നതോടെ അവര്‍ അക്കൗണ്ടില്‍ നിന്ന് പണം പൂര്‍ണമായി പിന്‍വലിക്കാത്ത അവസ്ഥ വരും. ഇത് ട്രഷറിയുടെ അവസ്ഥ കൂടുതല്‍ മെച്ചപ്പെടുത്തുമെന്നാണ് കരുതുന്നതെന്നും മന്ത്രി പറഞ്ഞു.