കൊച്ചി: മതസ്പര്‍ധ കേസില്‍ പൊലിസ് കസ്റ്റഡിയിലായിരുന്ന എം.എം അക്ബറിനെ റിമാന്‍ഡ് ചെയ്തു. അഞ്ചുദിവസത്തെ ചോദ്യം ചെയ്യലിനുശേഷം ഇന്നലെ രാവിലെയാണ് എറണാകുളം ഒന്നാം ക്ലാസ് ജുഡിഷ്യല്‍ മജിസ്‌ട്രേറ്റ് കോടതിയില്‍ ഹാജരാക്കിയത്. 14 ദിവസത്തേക്കാണു റിമാന്‍ഡ്.
അദ്ദേഹം എം.ഡിയായ ചക്കരപ്പറമ്പ് പീസ് ഇന്റര്‍നാഷനല്‍ സ്‌കൂളില്‍ മതസ്പര്‍ധ പരത്തുന്ന പാഠഭാഗങ്ങള്‍ സിലബസില്‍ ഉള്‍പ്പെടുത്തിയ കേസില്‍ വിദേശത്തായിരുന്ന അക്ബര്‍ 24നാണു ഹൈദരാബാദ് വിമാനത്താവളത്തില്‍ പിടിയിലായത്. തുടര്‍ന്നു 26നു കോടതിയില്‍ ഹാജരാക്കി കസ്റ്റഡിയില്‍ വാങ്ങി. കേസില്‍ ആറാം പ്രതിയാണ് അക്ബര്‍. പൊലിസ് കസ്റ്റഡിയിലിരിക്കെ ദേശീയ അന്വേഷണ ഏജന്‍സിയും കേന്ദ്ര ഇന്റലിജന്‍സ് ബ്യൂറോയും ഉള്‍പ്പെടെ ഏജന്‍സികള്‍ അദ്ദേഹത്തെ ചോദ്യം ചെയ്തിരുന്നു.