കൊച്ചി: ഇന്തോ-ബംഗ്ലാദേശ് അതിര്‍ത്തിവഴി കോടിക്കണക്കിന് രൂപയുടെ കള്ളക്കടത്ത് നടത്തുന്ന അന്താരാഷ്ട്ര സംഘത്തലവനെ സി.ബി.ഐ പിടികൂടി.
കള്ളക്കടത്തിന് പിടിയിലായ മലയാളി ബി.എസ്.എഫ് കമാന്‍ഡന്റ് ജിബു ഡി. മാത്യുവിന് 45 ലക്ഷം രൂപ കൈമാറിയ കൊല്‍ക്കത്ത സ്വദേശി മുഹമ്മദ് ഇനാമുല്‍ഹഖിനെ(ബിഷു ഷെയ്ഖ്)യാണ് കൊച്ചി സി.ബി.ഐ സംഘം പിടികൂടിയത്. കഴിഞ്ഞ ജനുവരി 30ന് ട്രെയിനില്‍ സഞ്ചരിക്കുന്നതിനിടെ ആലപ്പുഴയില്‍വച്ചാണ് ജിബുവിനെ സി.ബി.ഐ പിടികൂടിയത്. ഇയാളുടെ പക്കല്‍ നിന്ന് 45 ലക്ഷം രൂപയും കണ്ടെടുത്തിരുന്നു. ഇന്തോ-ബംഗ്ലാദേശ് അതിര്‍ത്തിയില്‍ കമാന്‍ഡന്റായ ജിബുവിന് കള്ളക്കടത്ത് സംഘത്തെ സഹായിച്ചതിന് ലഭിച്ചതാണ് ഈ പണമെന്നാണ് സി.ബി.ഐ നിഗമനം. പണം ബിഷു ഷെയ്ഖ് നല്‍കിയതാണെന്നായിരുന്നു ജിബുവിന്റെ മൊഴി. എന്നാല്‍ ഫോണ്‍ രേഖകള്‍ പരിശോധിച്ച സി.ബി.ഐ ഇത് വ്യാജപേരാണെന്നും മുഹമ്മദ് ഇനാമുല്‍ഹഖ് എന്നാണ് യഥാര്‍ഥ പേരെന്നും തിരിച്ചറിഞ്ഞു. തുടര്‍ന്ന് സൈബര്‍ വിദഗ്ധരുടെ സഹായത്തോടെയാണ് ഇയാളുടെ വാസസ്ഥലം കണ്ടെത്തിയത്.
തിങ്കളാഴ്ച ധാക്കയില്‍ നിന്ന് കൊല്‍ക്കത്തയിലെത്തിയ ഇനാമുലിനെ സി.ബി.ഐ പിടികൂടുകയായിരുന്നു. ഇയാളെ കൊല്‍ക്കത്ത സി.ബി.ഐ ഓഫിസിലെത്തിച്ച് അറസ്റ്റ് രേഖപ്പെടുത്തിയശേഷം അവിടുത്തെ കോടതിയില്‍ ഹാജരാക്കി. ട്രാന്‍സിസ്റ്റ് വാറണ്ട് വാങ്ങിയാണ് ഇനാമുലിനെ കേരളത്തിലെത്തിച്ചത്. ഇന്ന് തിരുവനന്തപുരം സി.ബി.ഐ കോടതിയില്‍ ഹാജരാക്കും. ബംഗ്ലാദേശില്‍ നിന്ന് കാലിക്കടത്തിന് സഹായിക്കാന്‍ ജിബു ഡി.മാത്യുവിന് ലക്ഷക്കണക്കിന് രൂപ കോഴ നല്‍കിയിരുന്നതായി ഇനാമുല്‍ സി.ബി.ഐയ്ക്ക് മൊഴി നല്‍കിയിട്ടുണ്ട്.