കാട്ടിക്കുളം: വേനല്‍ ശക്തമായതോടെ തിരുനെല്ലിയിലും പരിസര പ്രദേശങ്ങളിലും കുടിവെള്ളം പോലും ലഭിക്കാതെ ജനം ദുരിതത്തില്‍.
തിരുനെല്ലി പഞ്ചായത്തിലെ അരണപാറ നരിക്കല്ല്, അപ്പപാറ, കോട്ടമൂല മിച്ചഭൂമി, കാട്ടിക്കുളം, പുളിമൂട്കുന്ന്, തൃശ്ശിലേരി എന്നിവിടങ്ങളിലാണ് വരള്‍ച്ച രൂക്ഷമായിരിക്കുന്നത്. കാപ്പ് കൊല്ലി പ്രദേശങ്ങളില്‍ എവിടെയും വെള്ളം കിട്ടാനില്ലന്ന് സമീപവാസികള്‍ പറയുന്നു. മുന്‍ വര്‍ഷം റവന്യു വകുപ്പും പഞ്ചായത്തും ലക്ഷങ്ങള്‍ മുടക്കി മിക്ക ഭാഗങ്ങളിലും ടാങ്ക് സ്ഥാപിച്ച് ജലവിതരണം നടത്തിയിരുന്നു. എന്നാല്‍ ഈ വര്‍ഷം വരള്‍ച്ച കഠിനമായിട്ടും കുടിവെള്ളമെത്തിക്കാനായി ഇതുവരം അധികൃതര്‍ ഒരു നടപടിയും സ്വീകരിച്ചിട്ടില്ല. പഞ്ചായത്തിന്റെ വിവിധ പ്രദേശങ്ങളിലായി സ്ഥാപിച്ച 60 ഓളം 5000 ലിറ്റര്‍ ശേഷിയുള്ള വെള്ള ടാങ്കുള്‍ ഉപയോഗമില്ലാതെ നശിക്കുകയാണ്. മുന്‍ വര്‍ഷം കലക്ടര്‍ ഇടപെട്ട് വാഹനങ്ങളില്‍ പ്രദേശങ്ങളില്‍ കുടിവെള്ളം എത്തിച്ചിരുന്നു. എന്നാല്‍ ഇപ്പോള്‍ നാഥനില്ലാത്ത സ്ഥിതിയാണന്നുള്ള ആരോപണവുമുയരുന്നുണ്ട്. പാല്‍വെളിച്ചം ജലവിതരണ പദ്ധതിയില്‍ നിന്നും മിക്ക പ്രദേശങ്ങളിലും വെള്ളം ലഭിക്കാത്ത സ്ഥിതിയാണ്. വാട്ടര്‍ അതോറിറ്റയും കുടിവെള്ളം ലഭ്യമാക്കുന്ന കാര്യത്തില്‍ അലംഭാവം തുടരുകയാണെന്നും ആരോപണമുണ്ട്.