തളിപ്പറമ്പ്: ഇംഗ്ലിഷ് പഠനം മെച്ചപ്പെടുത്താന്‍ സംസ്ഥാനത്തെ പ്രാഥമിക വിദ്യാലയങ്ങളില്‍ നടപ്പാക്കുന്ന ഹലോ ഇംഗ്ലിഷ് പരിപാടിക്ക് ജില്ലയില്‍ തുടക്കമായി. പൂമംഗലം യു.പി സ്‌കൂളില്‍ അഞ്ച് ദിവസമായി നടന്നുവന്ന പരിശീലനം ഇന്നലെ സമാപിച്ചു. കളികള്‍, ചിത്രരചന, നാടകീകരണം, കഥാപുസ്തകങ്ങളെ ചങ്ങാതികളാക്കി മാറ്റുന്ന വായന തുടങ്ങിയ വൈവിധ്യമാര്‍ന്ന തന്ത്രങ്ങളിലൂടെ ആസ്വാദ്യകരമായ അന്തരീക്ഷമൊരുക്കി ഇംഗ്ലിഷ് പഠനം അനായാസമാക്കുന്നതിനുള്ള എസ്.എസ്.എയുടെ പഠനപോഷണം പരിപാടിയാണ് ഹലോ ഇംഗ്ലിഷ്.
ഡയറ്റ് പ്രിന്‍സിപ്പല്‍ കെ. പ്രഭാകരന്‍, എസ്.എസ്.എ സംസ്ഥാന കണ്‍സല്‍ട്ടന്റ് ഡോ. പി.കെ ജയരാജ്, ഡൊ. കെ.എം ഉണ്ണികൃഷ്ണന്‍, എസ്.എസ്.എ ജില്ലാ പ്രൊജക്ട് ഓഫിസര്‍ ഡോ. പി.പി പുരുഷോത്തമന്‍, പ്രോഗ്രാം ഓഫിസര്‍മാരായ കെ.ആര്‍ അശോകന്‍, ടി.പി വേണുഗോപാലന്‍, ബി. പി.ഒ എസ്.പി രമേശന്‍ അവലോകനം നടത്തി. സംസ്ഥാന പരിശീലനം നേടിയ ഇ.വി സന്തോഷ് കുമാര്‍, കെ. രാകേഷ്, കെ. പ്രകാശന്‍, എം. ഉനൈസ് എന്നീ അധ്യാപകരാണ് ട്രൈഔട്ട് നയിക്കുന്നത്. നാളെ സമാപന പരിപാടിയില്‍ ജില്ലാ പഞ്ചായത്ത് വൈസ് പ്രസിഡന്റ് പി.പി ദിവ്യ വിജയ പ്രഖ്യാപനം നടത്തും. ഈ വര്‍ഷം ജില്ലയില്‍ പൂമംഗലം യു.പി സ്‌കൂളില്‍ മാത്രമാണ് പരിപാടി നടപ്പാക്കുന്നത്. അവധിക്കാലത്ത് അധ്യാപകര്‍ക്ക് പരിശീലനം നല്‍കി അടുത്തവര്‍ഷം മുതല്‍ മുഴുവന്‍ വിദ്യാലയങ്ങളിലേക്കും പദ്ധതി വ്യാപിപ്പിക്കാനാണ് പൊതുവിദ്യാഭ്യാസ വകുപ്പ് ഉദ്ദേശിക്കുന്നത്.