തിരുവനന്തപുരം: തൃശൂരില്‍ നടന്ന 58ാമത് സ്‌കൂള്‍ കലോത്സവത്തിന്റെ പത്ര-ദൃശ്യ-ശ്രവ്യ-ഓണ്‍ലൈന്‍ മാധ്യമ രംഗത്തെ മികവുറ്റ പ്രകടനങ്ങള്‍ക്കുള്ള മാധ്യമ അവാര്‍ഡ് പ്രഖ്യാപിച്ചു. സുപ്രഭാതം ഫോട്ടോഗ്രാഫര്‍ ഷമ്മി സരസാണ് മികച്ച ഫോട്ടോഗ്രാഫര്‍ക്കുള്ള പുരസ്‌കാരം നേടിയത്. കണ്ണൂര്‍ ആദികടലായി വട്ടക്കുളം വി. പ്രേമരാജന്റെയും എന്‍. സരസ്വതിയുടേയും മകനാണ് ഷമ്മിസരസ്.
ചന്ദ്രികയിലെ കെ. ശശി ജൂറിയുടെ പ്രത്യേക പരാമര്‍ശത്തിനര്‍ഹനായി.
മികച്ച റിപ്പോര്‍ട്ടിങ്ങിനുള്ള അവാര്‍ഡ് ജനയുഗത്തിലെ സുരേഷ് ചൈത്രവും ദേശാഭിമാനിയിലെ വി.എം രാധാകൃഷ്ണനും പങ്കിട്ടു. മികച്ച കാര്‍ട്ടൂണിനുള്ള പുരസ്‌കാരം മലയാള മനോരമയിലെ കെ.എം ശിഖ നേടി.
ദൃശ്യ മാധ്യമ വിഭാഗത്തില്‍ മികച്ച റിപ്പോര്‍ട്ടര്‍ക്കുള്ള പുരസ്‌കാരം മീഡിയ വണിലെ കെ. ദീപക് നേടി. അമൃത ടി.വിയിലെ ദീപക് ധര്‍മടം പ്രത്യേക പരാമര്‍ശത്തിന് അര്‍ഹനായി. മികച്ച കാമറാമാനുള്ള പുരസ്‌കാരം ജയ്ഹിന്ദ് ടിവിയിലെ അനൂപ് വി.ജെ ഏഷ്യാനെറ്റിലെ മധു മേനോന്‍ എന്നിവര്‍ പങ്കിട്ടു.
മികച്ച സമഗ്ര കവറേജിനുള്ള പുരസ്‌കാരം മാതൃഭൂമി ന്യൂസിനും മനോരമ ന്യൂസിനുമാണ്. കൈരളി പീപ്പിള്‍ ചാനല്‍ പ്രത്യേക പരാമര്‍ശത്തിന് അര്‍ഹമായി.
ഇംഗ്ലീഷ് അച്ചടി മാധ്യമം മികച്ച റിപ്പോര്‍ട്ടര്‍ പുരസ്‌കാരം സി.പി സജിത് ദി ന്യൂ ഇന്ത്യന്‍ എക്‌സ്പ്രസ്, രാമവര്‍മന്‍ ടൈംസ് ഓഫ് ഇന്ത്യ എന്നിവര്‍ പങ്കിട്ടു. മികച്ച കവറേജ് പുരസ്‌കാരം (ഇംഗ്ലീഷ്) ഡെക്കാന്‍ ക്രോണിക്കള്‍ നേടി. ഓണ്‍ലൈന്‍ മാധ്യമത്തിനുള്ള പുരസ്‌കാരം മനോരമ ഓണ്‍ലൈന്‍ നേടി. മികച്ച സ്‌ക്രീന്‍ ഷോട്ടിനുള്ള പുരസ്‌കാരം കേരള കൗമുദിക്കാണ്.
മികച്ച കവറേജിനുള്ള ശ്രവ്യമാധ്യമ അവാര്‍ഡ് ആകാശവാണി നേടി. മികച്ച റൗണ്ടപ്പ് മാതൃഭൂമി ന്യൂസിലെ എം.ബി ബാബു, മികച്ച ലേഔട്ട് മലയാള മനോരമ, മികച്ച പ്രത്യേക പതിപ്പ് ദേശാഭിമാനി, പ്രത്യേക പരാമര്‍ശം മാധ്യമം, സമഗ്ര കവറേജ് കേരള കൗമുദി എന്നിവയാണ് മറ്റ് പുരസ്‌കാരങ്ങള്‍.
ജേതാക്കള്‍ക്ക് ശില്‍പ്പവും പാരിതോഷികവും (വ്യക്തികള്‍ക്ക് 20,000 രൂപയും സ്ഥാപനങ്ങള്‍ക്ക് 25000 രൂപയും) നല്‍കും.
ഏപ്രില്‍ 13ന് തൃശൂര്‍ റീജ്യനല്‍ തിയറ്ററില്‍ നടക്കുന്ന ചടങ്ങില്‍ പുരസ്‌കാരം വിതരണം ചെയ്യും.