ജിദ്ദ: അറബ് ലോകത്തെ മികച്ച സഞ്ചാര സാഹിത്യകാരിയായി അഷ്‌റഖ് അല്‍ അവ്‌സാത് പത്രത്തിലെ മാധ്യമപ്രവര്‍ത്തക ജോസ്‌ലിന്‍ ഏലിയയെ തിരഞ്ഞെടുത്തു. പത്താമത് അറബ് ടൂറിസം മീഡിയ ഓസ്‌കാര്‍ അവാര്‍ഡിനാണ് ജോസ്‌ലിന്‍ ഏലിയയെ തിരഞ്ഞെടുത്തത്.
പശ്ചിമേഷ്യയില്‍ നിലനില്‍ക്കുന്ന അനിശ്ചിതത്വങ്ങള്‍ക്കും സംഘര്‍ഷങ്ങള്‍ക്കുമിടയില്‍ പ്രദേശങ്ങള്‍ സന്ദര്‍ശിച്ച് യാത്രാ വിവരണങ്ങളും ലേഖനങ്ങളും എഴുതിയതാണ് ജോസ്‌ലിനെ അവാര്‍ഡിന് അര്‍ഹയാക്കിയത്.
അവാര്‍ഡ് ലഭിച്ചതില്‍ സന്തോഷമുണ്ടെന്നും തനിക്ക് വോട്ടു ചെയ്ത എല്ലാവര്‍ക്കും നന്ദി അറിയിക്കുന്നതായും ജോസ്‌ലിന്‍ പറഞ്ഞു.
ചൊവ്വാഴ്ച ബെര്‍ലിന്‍ അന്താരാഷ്ട്ര ടൂറിസം ഫെയറില്‍ നടന്ന ചടങ്ങിലാണ് അവാര്‍ഡ് പ്രഖ്യാപിച്ചത്. 2012ല്‍ അറബ് സെന്റര്‍ ഫോര്‍ ടൂറിസം മീഡിയയുടെ അവാര്‍ഡും ജോസ്‌ലിന് ലഭിച്ചിരുന്നു.
14 അറബ് രാജ്യങ്ങളില്‍ നിന്നായി 187 പേരാണ് അവാര്‍ഡ് പരിഗണന പട്ടികയിലുണ്ടായിരുന്നത്. ജൂണില്‍ കെയ്‌റോവില്‍ നടക്കുന്ന ചടങ്ങില്‍ അവാര്‍ഡുകള്‍ വിതരണം ചെയ്യും.