ലണ്ടന്‍: സ്വാന്‍സീ സിറ്റിയെ മറുപടിയില്ലാത്ത മൂന്ന് ഗോളുകള്‍ക്ക് വീഴ്ത്തി ടോട്ടനം ഹോട്‌സ്പര്‍ ഇംഗ്ലീഷ് എഫ്.എ കപ്പിന്റെ സെമിയിലേക്ക് മുന്നേറി. സൂപ്പര്‍ താരം ഹാരി കെയ്‌നിന്റെ അഭാവത്തില്‍ കളിക്കാനിറങ്ങിയ ടോട്ടനം ക്രിസ്റ്റ്യന്‍ എറിക്‌സന്‍ നേടിയ ഇരട്ട ഗോളുകളുടെ മികവിലാണ് വിജയവും സെമി ബര്‍ത്ത് ഉറപ്പിച്ചത്. ശേഷിച്ച ഗോള്‍ ലമേല നേടി.
കളിയുടെ 11ാം മിനുട്ടില്‍ തന്നെ എറിക്‌സനിലൂടെ ടോട്ടനം ലീഡ് സ്വന്തമാക്കി. ആദ്യ പകുതി തീരാന്‍ നിമിഷങ്ങള്‍ മാത്രമുള്ളപ്പോള്‍ ലമേലയിലൂടെ അവര്‍ ലീഡുയര്‍ത്തി.
പിന്നീട് 62ാം മിനുട്ടില്‍ തന്റെ രണ്ടാം ഗോളിലൂടെ എറിക്‌സന്‍ ടോട്ടനത്തെ സുരക്ഷിതരാക്കി.
എവര്‍ട്ടന് ജയം
ലണ്ടന്‍: ഇംഗ്ലീഷ് പ്രീമിയര്‍ ലീഗ് പോരാട്ടത്തില്‍ എവര്‍ട്ടന് വിജയം. എവേ പോരാട്ടത്തില്‍ അവര്‍ 2-1ന് സ്റ്റോക് സിറ്റിയെ വീഴ്ത്തി. മറ്റ് മത്സരങ്ങളില്‍ ബേണ്‍മൗത്ത് 2-1ന് വെസ്റ്റ് ബ്രോംവിചിനേയും ക്രിസ്റ്റല്‍ പാലസ് 2-0ത്തിന് ഹഡ്ഡേഴ്‌സ്ഫീല്‍ഡിനേയും കീഴടക്കി.
വലന്‍സിയ വിജയിച്ചു
മാഡ്രിഡ്: സ്പാനിഷ് ലാ ലിഗ മത്സരത്തില്‍ വലന്‍സിയക്ക് വിജയം. സ്വന്തം തട്ടകത്തില്‍ അവര്‍ ഡിപോര്‍ടീവോ അലാവെസിനെ 3-1ന് പരാജയപ്പെടുത്തി. മറ്റ് മത്സരങ്ങളില്‍ ലെവാന്റെ സ്വന്തം തട്ടകത്തില്‍ 2-1ന് എയ്ബറിനെ കീഴടക്കിയപ്പോള്‍ ഡിപോര്‍ടീവോ ലാ കൊരുണ- ലാസ് പല്‍മാസ് മത്സരം 1-1ന് സമനില.