തിരുവനന്തപുരം: കൗണ്‍സില്‍ ഓഫ് ദലിത് ക്രിസ്ത്യന്‍സ് കേരളയുടെ നേതൃത്വത്തില്‍ സെക്രട്ടേറിയറ്റിനു മുന്നില്‍ രാപകല്‍ സമരം തുടങ്ങി. ദലിത് ക്രൈസ്തവര്‍ക്കു ലഭിച്ചുകൊണ്ടിരിക്കുന്ന ഒരു ശതമാനം സംവരണം നാലു ശതമാനമായി വര്‍ധിപ്പിക്കുക, സംവരണ സമ്പ്രദായം പുനഃക്രമീകരിക്കുക, വായ്പാ കുടിശ്ശിക എഴുതിത്തള്ളുക തുടങ്ങിയ ആവശ്യങ്ങളുന്നയിച്ചാണ് സമരം.
ഇന്നലെ രാവിലെ പത്തിന് കൊട്ടാരക്കര സി.എസ്.ഐ മഹായിടവക ബിഷപ്പ് റൈറ്റ് റവ. ഡോ. ഉമ്മന്‍ ജോര്‍ജ് ഉദ്ഘാടനം ചെയ്തു. വി.ജെ ജോര്‍ജ്, എസ്.ജെ സാംസണ്‍, എസ്. ധര്‍മരാജ്, ജോയ്‌പോള്‍ തുടങ്ങിയവര്‍ സംസാരിച്ചു. കഴിഞ്ഞ ദിവസം വൈദികരെ അധിക്ഷേപിച്ച് പ്രസ്താവന നടത്തിയെന്നാരോപിച്ച് പി.സി ജോര്‍ജ് എം.എല്‍.എയുടെ കോലം സമരക്കാര്‍ കത്തിച്ചു.