ഫിറോസാബാദ്: ബിഹാറിലെ വിചിത്രമായ കോപ്പിയടികള്‍ വലിയ വാര്‍ത്തകളാവാറുണ്ട്. എന്നാല്‍ യു.പിയില്‍ നിന്നുള്ള പരീക്ഷാ വാര്‍ത്ത, കൈക്കൂലിയുടേതാണ്. വിജയിപ്പിക്കാന്‍ വേണ്ടി കറന്‍സി നോട്ടുകള്‍ ഉത്തരക്കടലാസിന്റെ കൂടെ ഒട്ടിച്ചുനല്‍കിയിരിക്കുകയാണ് വിദ്യാര്‍ഥികള്‍.

പന്ത്രണ്ടാം ക്ലാസ് വിദ്യാര്‍ഥികളാണ് പരീക്ഷ ജയിക്കാന്‍ നോട്ടുകള്‍ ഒട്ടിച്ചുനല്‍കിയത്. 50, 100, 500 രൂപ നോട്ടുകളാണ് ഉത്തരകടലാസില്‍ ഒട്ടിച്ച് അയച്ചത്. യു.പി ഫിറോസാബാദില്‍ നിന്നുള്ള ഒരു സ്‌കൂളിലാണ് സംഭവം.

മെറിറ്റിന്റെ അടിസ്ഥാനത്തില്‍ മാത്രമാണ് ഞങ്ങള്‍ മാര്‍ക്ക് നല്‍കുന്നതെന്നും ഉത്തരക്കടലാസുകള്‍ക്കൊപ്പമുള്ള പണം എടുത്തിട്ടില്ലെന്നും മൂല്യ നിര്‍ണയ അധ്യാപകര്‍ പ്രതികരിച്ചു.